Amillubiren bigarren urteurrena ospatu zuteneko irudia, iragan abenduan: auzolana, kafea, ekitaldia eta errituala egin zituzten.

Irakurleak oroituko duenez, 2023ko abenduan abiatu zuen laborantza ekologikoaren aldeko Biolur elkarteak Zestoako Amilibia baserria eta bere lurrak kolektiboki erosteko prozesua. 390.000 euro biltzeari ekin zioten, baserria eta lurrak erosteko eta baserria konpondu ahal izateko. Honela eman dute jakitera zertan den baserriaren erosketa: "2023ko abendutik, pausoz pauso eta herriaren babesari esker, hitzartutako kopurua zatika ordaintzen joan gara. Bidean jasotako elkartasuna izugarria izan da: herritarren, kolektiboen eta eragileen konfiantzak eta laguntzak proiektuari indarra eman diote, eta bihotzez eskertu nahi dizuegu erakutsitako konpromisoa". Orain, "azken txanpan" daude: "Baserria erosteko prozesua ixteko azken ahalegina behar dugu, eta horretan ari gara, hainbat diru-iturri bilatzen eta aukera berriak aztertzen". Horregatik, gogorarazi dute edozein ekarpen ekonomiko oso baliotsua eta ongietorria izango dela (hemen daude adierazita ekarpenak egiteko moduak): "Ekarpen bakoitzak Amillubi errealitate bihurtzera hurbiltzen gaitu, eta lurra, agroekologia eta komunitatea erdigunean jarriko dituen etorkizuna eraikitzen laguntzen du. Eskerrik asko orain arte egindako bideagatik, eta bidean bidelagun izaten jarraitzeagatik".

Erosketa konpromisoei aurre egiteaz gain, Amillubi etorkizunean zehazki zer izango den proiektua lantzen ari dira. Horretarako, "Utopiak eraikitzen" prozesua jarri dute martxan Asunek behatokiarekin lankidetzan, eta hurrengo 5-15 urteetan Amillubik egingo duen ibilbidea diseinatzeari ekin diote. Prozesu horretan, lehenik balioak eta lan-ardatzak zehaztu dituzte, eta orain proiektu estrategikoak diseinatzen hasiko dira.

Amillubi proiektuaren helburua honela adierazi dute: "Gipuzkoan elikadura-burujabetzaren aldeko estrategia iraunkorra eraikitzea, nekazaritzarako lur emankorrak babestuta eta elikagaien ekoizpen ekologikoa sustatuta. Aldi berean, lehen sektoreko erreleboa bermatzeko baldintza duinak sortu nahi ditugu, lanpostu berriak eta proiektu komunitarioak garatuta".

Hitz hauekin definitu dituzte Amillubi proiektuaren oinarriak: "Amillubin lurra, pertsonak eta komunitatea zaintzen dituen elikadura-eredua bultzatzen dugu. Ondare naturala defendatzen dugu, harreman justu, inklusibo eta parekideak eraikita, zaintza eta feminismoa erdigunean jarrita. Esperimentaziorako eta berrikuntza sozialerako espazio irekia gara, eta ekoizle berriei zein dagoeneko lanean ari direnei baldintza ekonomiko eta sozial bidezkoak eskaintzea dugu helburu". Moduei dagokienez, Amillubi lankidetzan eta parte-hartzean oinarritzen dute: formakuntza, belaunaldien arteko harremanak eta jakintzaren transmisioa sustatzen ditu Amillubik. "Topagune eta sare gisa funtzionatzen dugu, proiektuak kolektibizatzeko eta harreman berriak sortzeko espazio bat eskaintzen dugu".

Helburu eta izaera horiek oinarri gisa hartuta, proiektu pilotuak definitzeari ekin diote eta helburu gisa jarri dute abendu honetarako proiektuak zehaztuta izatea, 2027an martxan jartzen hasteko.

Baina bitartean, Amillubiko laborantza lurrak etengabe lantzen dituzte: gaur egun ilarra, lihoa, zekalea eta ongarri berdea dituzte ereinda lursailetan.

"Eskola Haziak"

Martxoan abiatuko ditu Amillubik "Eskola Haziak" formazio saioak, eta praktika eta teoria uztartuko dituzte: goizean auzolana egingo dute, Amillubiko eguneroko lanak eta behar praktikoak ezagutzeko. Ondoren, jakintza partekatzeko tailerra edo hitzaldia izango da, "ikasitakoa kolektiboki lantzeko, esperientziak trukatzeko eta gogoetarako espazioa irekitzeko".

Zazpi Eskola Hazi aurreikusi dituzte aurtengorako. Lehenbizikoa martxoaren 15ean izango da. Saio horretan intersekzionalitatearen gaia landuko dute Leticia Gil Urretabizkaiaren eskutik: zapalkuntzen arteko gurutzaketak ulertzen saiatuko dira eta agroekologiaren praktikan txertatzeko moduak aztertuko dituzte. Antolatzaileen hitzetan, "ikuspegi berriak eraikitzeko aukera izango dugu, elikadura burujabetzaren bidean aniztasuna eta justizia soziala erdigunean jarrita".

Hurrengo saioetan, berriz, gai hauek landuko dituzte: "Gure baratzetan burujabe", "bioeraikuntza", merkaturatze agroekologikoa", "pribilegio txuria agerian" eta "ekonomia sozial eraldatzailea". "Amillubi jakintza partekatzeko, elkarrekin ikasteko eta agroekologia herritik eta herriarentzat eraikitzeko espazioa da", adierazi dute partaideek.

III. Udaberriko Festa

Aurten hirugarren urtez egingo du Amillubik Udaberriko Festa, maiatzaren 16an, "Lurra oinarri, utopien bidean" lemapean. Goizean mahai inguruak egingo dituzte, "agroekologia, elikadura burujabetza eta alternatiba errealen inguruan hausnartzeko eta elkarrizketa sustatzeko". Arratsaldean, jai giroa izango da nagusi, hau da, "komunitatea sendotzeko eta ospakizunerako espazioa izango da Amillubi", bertako kideen esanetan: kontzertuak, zirko tailerra, eta adin guztientzako ekintza eta topaguneak egongo dira.