Urtarrila hotza ikazkinaren poza.

Amasa-Villabonako Udala Premier enpresarekin negoziatzen ari da Amasamendiko herri lurretan bi haize errota jartzeko baldintzak

Ander Goikoetxea Amasa-Villabonako zinegotzia da eta EH Bilduko Legebiltzarkidea. Premier ESPF Ipaz Haizea enpresak Amasamendin ezarri nahi dituen bi haize erroten orain arteko prozesua nola izan den azaldu du.


2025eko maiatzaren 06a
Enpresak udalean eta Jaurlaritzan planteatu duen eremua. Koloreek, Lurralde Plan Sektorialak eolikoak jartzeko izendatutako egokitasun maila agertzen dute: berdea "egokitasun handia", horia "ertaina", laranja "baxua", gorria "oso baxua" eta arrosa baztertu beharreko eremua.
Mundu bizigarriago bat eta bizitza gozagarriago bat egunero lantzen dugunon komunitateak eusten dugu Bizi Baratzea. Horregatik jartzen ditugu sarean eduki denak libre, Lurrari begiratzen eta entzuten diogunak gero eta gehiago izan gaitezen. Batu komunitatera. EGIN BIZI BARATZEAKOA.

Lehenik, enpresak bi haize errotako zentral batentzako konexio baimena lortu zuen Hernaniko azpiestazioan, 10 MW potentziakoa. Iberdrolak konexio puntu bat esleitu zion Andoaingo lurretan eta hortik 10 kilometroko erradioaren barruan kokatu dezakete proiektua. Enpresak Amasa-Villabonan ezartzea hautatu zuen. Behin hau izanda “eskabidea” aurkeztu zuen Jaurlaritzan.

Jaurlaritzan eskabidea egin eta jarraian, enpresak 5 MW-eko bi haize errota ezartzeko proposamena helarazi zuen udalera. "Kontsulta urbanistiko bat egin zuten, batetik, eta bisita txartel bat utzi zuten, bestetik", Goikoetxeak zehaztu duenez.

Udala haize erroten kokapena, energiaren salmenta eta jabetza negoziatzen

Enpresak udalean egindako kontsulta urbanistikoan eta Jaurlaritzan egin zuen eskabidean poligonal bat aurkeztu zuen. Poligonalak lur hauek hartzen ditu: Amasamendia Herri Onurako Mendia zati gehienean, eta jabetza pribatuko zenbait partzela.

Goikoetxeak azaldu duenez, "kontsulta urbanistikoan bi partzelaren inguruko kontsulta zehatza egin zuten. Partzelak bi partikularrenak ziren, Amasako hainbat baserritatik oso hurbil kokatuta zeuden (500 metro baino gutxiagora), eta ohiko erabilera duen borda baten gainean". Udala harremanetan jarri zen enpresako ordezkariekin, "kokapen honekiko eta orohar proiektuarekiko kezka adierazteko".

"Enpresak proiektuaren kokapena eztabaidatzeko borondatea azaldu zuen", Goikoetxeak kontatu duenez: "Udal gobernu taldetik horretan jarri ginen eta bizigune guztietatik aparte dagoen kokapen bat adostu genuen ahoz. Orain kontsulta urbanistiko berria jaso dugu udalean. Udal teknikariek erantzun beharko dute kokapen horiek bateragarriak ote diren mota honetako proiektu batekin".

"Enpresak energiaren salmenta negoziatzeko borondatea azaldu du", gehitu du Goikoetxeak. Honen hitzetan, udalak energia salmentaz gain jabetzaren inguruko eztabaida emateko beharra azaldu dio enpresari. "Orain negoziaketa fasean gaude", baieztatu du zinegotziak.

Udalak herri kontsulta iragarri du

"Enpresak ulertzera eman du ez duela tramitazioaren hurrengo fasera (Aldez Aurreko Administrazio Baimena) joko udalaren onarpenik gabe, ez delako haien enpresa politika lurjabeen baimenik gabe proiektuen tramitazio nagusiak abiatzea", Goikoetxearen hitzetan. 

Zinegotziak zera iragarri du: "Amasa-Villabonako udal gobernuaren borondatea da behin proiektuaren nondik norakoak argitzen direnean, herritarrei informazio gardena ematea eta herri kontsulta bat egitea. Enpresarekin azken akordio bat badago, herri kontsultan erabakiko da Amasa-Villabonako Udalak lurrak uzten dizkion bere proiektu eolikoa garatzeko. Hori onartuko balitz, enpresak Jaurlaritzako tramitazio osoa egin beharko luke ondoren".

"Hau ez da legez araututako prozedura bat, borondate kontua da"

Goikoetxeak zehaztu du Amasa-Villabonan proiektuak daraman prozedura ez dela berez legeak arautu duena. "Prozedura hau Amasa-Villabonan aplikatu daiteke hainbat faktore ematen direlako: enpresaren borondatea negoziaketarako, udalaren borondatea negoziaketarako, eta udalak lurren jabetza izatea. Hau ez da legez araututako prozedura bat, borondate kontua izan da".

Iragan astean Villabonako zineman ikusi ahal izan zen Bizitza ez berriztagarriak filma. Emanaldiaren ondoren iritzi trukea sortu zen bertan zeudenen artean, eta Ander Goikoetxeak ere hartu zuen hitza. Udalen eskumenen inguruan, zera zehaztu nahi izan du: "Legez, udalek proiektuak baldintzatzeko duten eskumen nagusia alegazioak aurkeztea da, Jaurlaritzako tramitazioko fase gehienetan egin dezakete. Ondoren, azken fasean, udalak Hirigintza baimena eman beharko luke, proiektua udalerri bakarrean garatzen bada, baina hori teknikarien iritziaren araberakoa da, udal teknikarien aurkako erabakiren bat hartzea prebarikazioa litzateke eta hau argitu nahi dut eztabaidaren erdigunean kokatu izan delako".

Zer dezake udal batek makroberriztagarrien aurrean?
2025-04-30 | Estitxu Eizagirre
Bizitza ez-berriztagarriak filma ikusentzun zuten atzo 70 inguru lagunek Villabonan. Francisco Vaquero egilea bertan izan zen eta emanaldiaren ostean hitza hartu zuten herritarrek, kargu publiko... (+)
Bizi Baratzea Orria: ARGIAk abiatu duen aldizkari berria, Bizi Baratzea proiektuaren 10. urteurrenean
2025-03-23 | Estitxu Eizagirre
Urtaro bakoitzean kaleratuko den aldizkari honek Lurrari buruzko jakintza praktikoa eta gaurkotasuneko gaiak jorratuko ditu. Formato oso berezia du: plegatutako orri handi bat da eta... (+)
EH Bizirikek manifestazioa deitu du larunbaterako 'Euskal Herria ez dago salgai!' lelopean
2025-03-20 | Estitxu Eizagirre
Sareak nabarmendu du Euskal Herri osoko eragileak daudela bertan eta deialdiak 140tik gora atxikimendu jaso dituela: "Horrek islatzen du zein den gaur egungo errealitatearen urgentzia,... (+)
"Paradisu zineman ikusiko gara...", haizeari puzka ari beharrean
2025-03-17 | Estitxu Eizagirre
Martxoak 15 goizean elurrak zuritu zuen Arano. Bertako herritarrek eta ingurutik eta ez hain ingurutik bildutakoek bete zuten plaza eta elkartasunaren beroan gozatu zuten eguna:... (+)
Beste makroeoliko proiektu bat, Lesaka eta Goizueta artean
2025-03-12 | Estitxu Eizagirre
Cefiro Holdco enpresak "Domiko" deitu dion eta bederatzi makroeoliko izango lituzkeen proiektua jarri nahi du Lesaka eta Goizuetako lurretan eta ebakuazio-linea Oiartzungo azpiestaziora bideratuko luke.... (+)
gora