Maiatzaren 16an hasi zuten kanpaldia eta hegaztiei jaten emateko gunera bisita egin zuten. Bertan izan zirenek kontatu dutenez, sai arre pila ikusteaz gain, sai zuria eta miru gorria ikusteko aukera izan zuten. Bertan ugatza ibiltzen dela badakiten arren, bisita hartan ez zuten ikusi. Partaideen hitzetan, "horrek agerian uzten du natur kontserbazioari begira zer nolako astakeria den horrelako balio natural handiko eremu batean makro mailako poligono eolikoa ezartzea, jakina baita instalazio hauek hegaztien heriotzaren arrazoi garrantzitsu bilakatu direla. Seo Birdlifek argitaratu zuen txostenaren arabera, Espainiako Estatuan urtean 6 eta 18 milioi hegazti artean hiltzen dituzte eolikoek, astakeria bat".

Batzuek hegazti harrapariekin gozatzen zuten bitartean, adin guztietako neska-mutilez osatutako talde bat Gasteiztik kanpalekuraino txirringaz hurbildu zen, ohiko trenaren bide berdea zeharkatuta.

Guztien artean kanpin-dendak jarri zituzten eta talde batek afari "ezin hobea" prestatu zuen: barazki salda eta txokolate beroa.

Larunbata: aurreko borroketatik eta egungo nazioartekoetatik ikasten

Larunbaterako prestatu zituzten ekitaldi gehien, eta parte hartze handieneko eguna izan zen. Gosaldu ondoren, bertaratu zirenek elkar ezagutzeko dinamika batekin eman zioten hasiera goizeko saioari: "Lurraldea defendatzeko zergatiak azaldu eta ingurukoenak ezagutzeko aukera izan genuen". 

Ondoren, aurreko borroka garrantzitsu batzuen errepasoa egin zuten, eta testigantzak ematera bertaratu ziren Lemoizko zentral nuklearraren, Pasaiako superportuaren eta Olaztiko erraustegiaren aurkako borroketan ibilitako kideak. Partaideek horrela laburtu dute hitzaldietan jaso zuten mezua: "Hiru borroka hauek intentsitate handikoak izan ziren, babes sozial handikoak, eta hiru proiektuak gelditzea lortu zuten. Ondorio garrantzitsu asko atera ziren, baina bi elementu hauek nabarmendu ziren. Eredu kapitalista gainditu ezean proiektu hauek behin eta berriz etorriko dira bueltan, horren adibide da gaur egun energia nuklearrari eman nahi zaion bultzada edo Olaztin berriro erraustegia martxan jartzeko jaso duten baimena. Gainera, belaunaldien arteko transmisioaren garrantzia azpimarratu zen, hau da, egindako borroken esperientzia gaur egun lurraren defentsan lanean ari direnei transmititzearen beharra".

Arratsaldean hainbat erresistentzia formen inguruan hausnartu eta horietako zenbait praktikan nola jarri ikasi zuten.

Eguneko azken mahai inguruan Kolonbia, Salvador, Honduras eta Palestinako kideak izan zituzten hizlari: "Herrialde bakoitzean lurraren defentsak zer esan nahi duen azaldu ziguten, borrokaren garrantzia azpimarratu zuten, eta egungo eredu ekonomikoa gainditzeko urgentzia jarri zuten mahai gainean", azaldu dute partaideek. Nabarmendu dutenez, "bakoitzak bere eremuan borroka aurrera eramateari garrantzi handia eman zioten, errealitate ezberdinak direla iruditu arren, mundu globalizatuan dena loturik baitago. Ipar hemisferioko enpresari handiak ari dira hego hemisferioan suntsiketa handienak eragiten (ekologikoak, sozialak zein pertsonalak) eta beraien testigantzarekin ekarri zizkiguten, bizipen oso gogorrak benetan".

Afalostean, gaua girotu zuten Aramaioko emakumeen taldeak eskainitako Kantaldi Ekofeministak eta Kojío Kon Pinsas musikariek.

Igandea: mendi martxa eta lege-arloko borroken formazioa

Igande goizean partaideek bi aukera izan zituzten: mendi martxa eta arlo juridikoa lantzeko hitzaldi-tailerra.

Mendiko irteeran parte hartu zutenek kontatu dutenez, "ibilaldiak aukera eman zigun inguruak duen natur balio handiaz gozatzeko: pagoz osaturiko basoetan zehar egin genuen ibilbidearen zatirik handiena eta, egia esan, eskertzen zen zuhaitzen itzala. Beste behin, eremu natural horretan egiten ari den suntsiketa (Laminoriako harrobia) eta egin nahi direnak (eolikoak, fotovoltaikoak eta AHT) ulergaitzak dira natur kontserbazioaren ikuspuntutik, ezinbesteko afera egungo krisi ekologikoan". 

Hitzaldi-tailerrean lehenik Raoul Servertek hartu zuen hitza. Bertan parte hartu zutenen hitzetan, "Raoulek egungo testuinguruaren analisia egin zuen, eta aurreko zein gaur egungo makro mailako berriztagarrien zabalpen masiboaren zentzugabekeria salatzen amaitu zuen bere hitzartzea". Ondoren, Sustrai Erakuntzako kideek lege-arloan aurrera eraman dituzten borroken indargune eta ahulguneak zein izan diren azaldu zuten. Horrez gain, lurraren suntsiketari aurre egiteko borrokan lege-prozedura zein den azaldu zuten. Hitzaldi-tailerraren amaiera entzuleen eta hizlarien arteko tertulia bihurtu zen.

Elkarrekin bazkalduz eman zioten amaiera EH Biziriken lehenengo kanpaldiari, guztien artean herria "utzi ziguten egoera berean uzteko lanak" egin ostean.