Diario Vasco-k egindako elkarrizketan Barredok adierazi du ez dela laguntzetarako garaia, "arazoak konpontzekoa baizik". Bere hitzetan, ur eta bazka hornidura, gaur gaurkoz, "nahikoa bideratuta" daude. "Orain egoerak nola eboluzionatzen duen monitorizatzen jarraitu behar da", esan du, "eguraldia alda daiteke eta horrek beharrak eta azken galerak alda ditzake. Gainera, erregaia eta ongarriak eskuratzeko laguntzak eman dira jada".

Bazka-erosketa bateratuaz galdetzean, sailburuak esan du "erosketaren kudeaketa bateratua" egin dutela: "Sektoreari bazka eskuragarri duten hornitzaileen zerrenda eman zaio, zeintzuek bolumen jakin batzuk adostutako prezioetan eskaintzeko konpromisoa hartu duten. Ustiategi bakoitzak egokitzat jotzen duen hornitzailearengana jo dezake zuzenean. Beste bide batetik baldintza hobeak lortzen badituzu, primeran. Baina, gaur egun, ez dirudi Administrazioak erosketa bateratua egin behar duenik, tokiko hornitzaileek sektorea hornitzeko gaitasun nahikoa dutelako". Barredok argitu du lastoa, pentsu blokeak, alpapa eta arto silo nahikoa dutela, datozen hilabeteetara begira.

Abeltzainen haserrea

ENBA eta EHNE sindikatuak haserre agertu dira, astearteko bileran adostu beharrekoez Barredok aurrez elkarrizketa eman duela-eta. EHNEko presidente Garikoitz Nazabalen hitzetan, "gauza bat da hiriei ura emateko arazorik ez izatea, eta beste gauza bat esatea ez gaudela lehorte egoeran. Ikusi besterik ez dago zenbat hilabete daramatzagun animaliei edaten emateko arazoekin". Sailburuak urik falta ez dela esatea "astakeria" dela adierazi du Nazabalek. Tokiko hornitzaileekin adostutako prezioen inguruan, EHNEko presidenteak salatu du ez direla egiazkoak, "orientatiboak" baizik –Jaurlaritzak esan duen moduan–: "Merkatu-prezioan eskaintzen da eta, hortaz, ez du ezertarako balio".

ENBAko koordinatzaile Xabier Iraolak, bestalde, Jaurlaritzak erosketa bateratua alboratu izana "frustragarria" dela salatu du. Abeltzainek erosketa bateratua adostea espero zutela dio, horrek ekarriko lukeelako kostuak merkatzea.