Abere azokez gain, idi demak ere debekatu ditu Jaurlaritzak.

2026ko otsailaren 26ra bitartean, abere azokarik ez da izango gehiago, Eusko Jaurlaritzako Elikadura, Landa Garapen, Nekazaritza eta Arrantza Sailak bertan behera utzi dituelako. Dena den, salbuespen gisa, foru-aldundiek animaliekin egiten diren ekitaldi jakin batzuk baimendu ahal izango dituzte. Kutsatzeko arriskurik ez duten animaliak egon ohi diren ekitaldiak egin ahal izango dira, esaterako, baldin eta beharrezko neurri guztiak hartzen badira.

Euskal Herrian ez da agertu dermatosi nodularraren kasurik, baina Pirinio Atlantikoetako departamenduan, adibidez, bai, eta horregatik erabaki du Jaurlaritzak indarrean zeuden osasun neurriak are gehiago zorroztea. Hala, azokak debekatzeaz gain, animaliak garraiatzeko baldintzak ere gogortu ditu. Esaterako, ibilgailu guztiek garbiketa eta desinfekzio ziurtagiria eraman beharko dute, eta derrigorrezkoa izango da animaliek izan ditzaketen intsektuak akabatzea, hiltegirako joan-etorrian izan ezik. Gainera, dermatosi nodularraren aurrean "eremu mugatutzat" jotakoetan dauden ustiategietako animaliak EAEn sartzea debekaturik izango dute abeltzainek; eta EAEtik kanpoko beste eremu batzuetatik eramandako abelburuen gaineko kontrola zorroztu egingo da.

Lapurdiko laborarien protestak

Ipar Euskal Herriko abeltzainek asteak daramatzate dermatosi nodularrari aurre egiteko Frantziako Gobernuak ezarritako protokoloen aurka protestan, eta astelehenean ere Senperetik eta Urruñatik abiatutako traktoreek Baionarako bidea egin dute lehenengo, eta ondoren Beskoitzera joan dira, A64 autobidea blokatzera.

Astearte eguerdian, bestalde, ELB-k jakinarazi du Ahurtin A64 autobidea blokatzeko deia altxatzen duela, presioa mantenduko duen arren: "ELB eta Coordination Rurale deiari erantzunik, ainitz laborari mobilizatu dira abenduaren 13tik haste, Estatuari presioa ezartzeko, jendetasunik gabeko eta
onartezinezkoa den politika sanitario horren kontra, polizia errepresio bortitz bati bateratuta".

"Hamar egun iraun duen Ahurtiko mobilizazioak erakutsi du gure atrebentzia desastre bat den politika sanitario horren kontra", diote laborariek. "Hamar eguneko okupazioak erakutsi du gure indarra, elkartasuna eta mobilizazioa eritasun horren kontra. Ministeritzaren azken berriek aldiz ez dute aitzinamendu izpirik erakusten. Estatuak ez
ditu laborariak eta herritarrak entzuten. Jakinez administrazioak pausak izanen direla ondoko egunetan, ELB-k kontsideratzen du hobe dela autopistako okupazioa altxatzea eta gure indarrak azkar atxikitzea, protokolo alternatibo egokitu baten gauzatzearen alde lan egiteko, laborarien eta kabalen errespetuan".