2025eko Udaberriko Festa Amillubin.

Goizeko 9:30ean hasiko dute eguna. Handik eta hemendik etorritakoek elkar agurtu ostean, bi mahai-inguru izango dira, festaren lemari ("Lurra oinarri, utopien bidean") erantzungo diotenak: mahai-inguruetan, esperientziak izango dira hitza hartuko dutenak, eta utopia izatetik errealitate bihurtzen ari diren proiektuak ezagutzeko aukera izango dute bertaratzen direnek.

14:30ean, Bazkari Agroekologikoa egingo dute elkarrekin. Antolatzaileek nabarmendu dutenez, "etorkizuneko elikadura ekoizpen duin eta jasangarrian oinarritu behar da, eta horregatik, tokiko produktu ekologikoak sustatzeko apustua egiten jarraituko dugu". Bazkarirako txartelak 10 euro balio du, eta haurrentzat 7 eurokoa izango da (txartelak hemen daude salgai).

Bazkalostean, kultur emanaldiak izango dira nagusi. Oholtza hartuko dute, besteak beste, Pobresiak poesia musikatuak; 1TZ4L1 3T4 P1ZTU bertsoa eta musika elektronikoa uztartzen dituen emanaldia; Berba Labanakaz eta Babarrunba musika taldeak eta, amaitzeko, DJ-ak.

Arratsaldeko emanaldietarako sarrerak 10 euroan egongo dira salgai, eta haurrentzat doakoak izango dira. Antolatzaileek sarrerak aldez aurretik erostea gomendatu dute, egitarauaren antolaketa errazteko.

Egun osoan zehar umeentzako txokoa egongo da martxan, eta goizean zaintza zerbitzua ere eskainiko dute. Arratsaldean, Hazietxezirkus-eko kideen eskutik zirku tailerra egingo dute.

Antolakuntzak jakinarazi du ibilgailuak Iraetako futbol zelaiko aparkalekuan utzi beharko direla; handik Amillubira oinezko bidea (5-10 minutu) seinaleztatuta egongo da. Mugikortasun arazoak dituztenentzat, garraio zerbitzua eskainiko dute.

Komunitatea, lurra eta kultura uztartzen dituen jaiaren bidez Amillubi proiektua lagundu nahi duenak, eguna hortxe dauka.