Azaroaren 10ean Sos Sollubek alegazioak aurkeztu dituenean eman duen egin duen prentsaurrekoa.

Sos Sollubek prentsaren aurrean adierazi duenez, "Gaur hemen aurkezten ditugun herri-alegazioak taxutzeko eta zabaltzeko izan dugun epea oso laburra izan bada ere, 3.289 sinadura, eta, sinadura horiekin batera, hirigintza- eta ingurumen-eraginak baloratzeko alegazio teknikoak ere aurkeztuko ditugu".

Sollube-gane proiektuaren berria 2023ko abenduan jakin zuten, EAEko Aldizkari Ofizialean argitaratu zenean: "Harrezkero, proiektu hori ezartzeak ekarriko lituzkeen arriskuez kontzientziatzeko lanean ari gara", gogoratu du herri-plataformak, eta jarraitu du: "Gaur aurkezten ditugun
alegazioek agerian uzten dute Grupo Arenak gure mendietan jarri nahi duen megaproiektuaren aurkako jarrera eta kezka".

195 metroko sei aerosorgailu landagunetik kilometro erdira

Sos Sollubek esan du ez ulertzen "nola izapidetu daitekeen 195 metroko sei aerosorgailuz eta 117 metroko dorre meteorologiko batez osatutako proiektu industrial bat, Bermeo, Meñaka eta Arrietako landa-guneetatik 500 metro eskasera eta zenbait herritatik 2 km eskasera dagoena. Horrez gain, 12,5 km-ko linea elektrikoak Meñaka, Gamiz-Fika, Arrieta eta Zamudioko udalerrietan ere izango du eragina. Ez dugu ulertzen Eusko Jaurlaritzaren eta Aldundiaren aztarnategi arkeologikoak, fauna, flora, paisaia, biosfera-erreserbak... kontserbatzeko planak ez betetzea eta erakunde horiek berak aritzea proiektu hau izapidetzen".

"Ezin dugu onartu beharraren banderapean eredu bat erreproduzitzen jarraitzea"

Sollube-gane proiektuak zergatik kezkatzen dituen argudiatu du plataformak: "Kezkaz ikusten dugu 2023az geroztik eta Nafarroan bakarrik 51 proiektu izapidetu dituen enpresa batek Sollubeko baliabideak ustiatu nahi izatea, gero Zamudioko Parke Teknologikoan dauden enpresek energia hori kontsumi dezaten. Kezkatzen gaitu gaur egungo testuinguruan, energiak eta bere ekoizpenak hainbesteko garrantzia hartu duten testuinguruan, planetaren zati handi bat hamarkadetan pobretzen jarraitzen duen espoliazio-eredu bera errepikatzeak. Ezin dugu onartu beharraren banderapean eredu bat erreproduzitzen jarraitzea, lurrak suntsitzen eta pobretzen dituzten erauzketa-enpresei baino mesede egiten ez diena".

Administrazio-prozesuaren "erabateko opakutasuna" salatu dute, "industria-proiektu horien instalazioa arautzen duten legeak eta araudiak urratzen dituena".

"Sollube-gane gelditzea eta eredu energetiko birplanteatzea eskatzen dugu"

"Lotsagarria da  auzorik eta herririk kaltetuenei horren berri eman nahi ez izana. Nola egon daiteke interes publikoko proiektu bati buruz hitz
egiten, jende kaltetuenaren informazioa, galdera eta kezkak jasotzen ez badira? Nola hitz egin daiteke iraultza berde eta ekologikoaz, kontuan hartzen diren interes bakarrak hemen inplikatutako enpresenak badira?", galdetu du herri-plataformak eta Sollube-ganeko proiektu eolikoa "geldiaraztea" eta "Euskal Herri osoan zehar 100 proiektu baino gehiago izapidetzen izatera eraman gaituen eredu energetikoa birplanteatzea" eskatu du.

"Fronte zabala" sortzera deitu ditu herritarrengandik gertueneko erakundeak: "Udalei eta gainerako erakundeei eskatzen diegu SOS Sollube plataformarekin eta lurralde osoan urte hauetan zehar sortu diren gainerako plataformekin inplikatzeko eta horiei laguntzeko. Gure ustez, bere baliabideekin eta gure sarearekin fronte zabala sor daiteke, Sollubeko proiektua bezalako beste proiektu industrial eta espekulatiboei aurre egin ahal izateko".

Lanean jarraitzeko asmoa berretsi du Sos Sollubek: "Lurra, bertako baliabideak eta jendea defendatuko ditugu. Beren beharrak asetzeko herritik sortzen diren ekimenak defendatuko ditugu. Eta, jakina, proiektu megalomano hauei laguntzarekin, senidetasunarekin eta elkartasunarekin egiten eta egingo diegu aurre".