Kirol ekimen asko egiten dira Euskal Herrian urte osoan, eta horrelakoetan kirolariek hartu ohi dituzten produktu energetikoetan jarri zuen begia 2019an Xavier Bourlon ziburuarrak: “Emaztea erlezaina da aspalditik, eta berarekin hasi nintzen lanean”. Naturan kirola egiteko ohitura zuen jendeari bideratutako produktuak egiten hastea bururatu zitzaion, etxeko eztia oinarri izanen zutenak. Tartean pandemiak harrapatuta, onartu du nahi baino mantsoago doala proiektua aurrera, baina dagoeneko ari da zenbait produktu ekoizten eta saltzen.
2016tik ARGIAn astero esperientzia baten berri ematen du.
“Euskal Herrian eta hurbilean kirola egiten duen jendeari bertako laborariek egindako produktuak eskaintzea zen ideia, errezeta sinple batekin, kimikorik eta enbalatzerik gabe”, azaldu du Bourlonek. Momentuz, haiek ekoiztutako eztia oinarri duten barra energetikoak eta gel-ak ekoizten dituzte. Barrak egiteko almendrak, intxaurrak, oloa, zekalea, abrikotak eta aranak darabiltza, eztiaz gain. Gel-en kasuan, berriz, bi motakoak egiten ditu: eztiarekin eta limoiarekin egindakoa bata; eta eztiarekin, limoiarekin eta jengibrearekin egindakoa bestea.
Dardareko produktuen osagai guztiak ekologikoak dira, eta saiatzen dira horiek hurbiletik ekartzen. Oloa Landetako enpresa bati hartzen diote, eta abrikotak eta aranak, Frantziako Estatuko hego-mendebaldetik dakartzate. Eraldaketa, berriz, Senpereko Hurbil gunean egiten du Bourlonek berak. “Zortzi ekoizleren artean martxan jarri genuen gunea da Hurbil, bertan eraldatzen ditugu gure produktuak, eta salmenta gunea ere badago”, azaldu du.
Senpereko gunean eta hurbileko kontsumitzaileen elkarte eta dendetan saltzen ditu produktuak batik bat Bourlonek. Espero zuenaren kontra, ordea, kirolarien artean tokia egitea ez da hain erraza izaten ari: “Pentsatzen nuen hurbileko eta kalitatezko produktuok segituan piztuko zutela kirolarien interesa, baina errealitatea da haiek marka konkretuak erabiltzen dituztela gehienetan, eta ohitura horiek aldatzeko beldur direla”. Produktua ezagutzera emateko esfortzu handia egin behar dela dio ekoizleak, eta momentuz, kirol munduko jendeari probatzeko barrak ematen ari da.
“Lehiaketen munduan ari diren horiengana ez gara gehiegi iritsi oraindik, modu lasaiagoan kirola egiten dutenak, naturan ibilbideak egitera ateratzen direnak eta horrelakoak dira barrak erosten dituztenak, batez ere”, dio. Horiekin batera, gurasoak ere ohiko bezero omen ditu ziburuarrak, haurren hamaiketakorako erabiltzen baitituzte produktuok. Proposamen berritzailea eta desberdina da Dardare, betiko formulari buelta bat eman baina betiko eta kalitatezko produktuak oinarri dituena.
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545
Ekonomia sozial eraldatzailearen sareko kide da ARGIA (Bizi Baratzea). Informazio burujabetza helburu, egunerokoan gauzak egiteko beste modu batean sinesten dugu.
BIZI BARATZEAko edukiak kopiatu, moldatu, zabaldu eta argitaratzeko libre zara, beti ere, gure egiletza direla aitortzen baduzu eta baldintza beretan egiten baduzu.
