Petronor findegiaren irudi orokorra Muskizen.

EH Bilduk egindako galdera bati erantzunez, Guillermo Herrero Eusko Jaurlaritzako Osasun Publikoaren eta Adikzioen zuzendariak hitz egin du astelehenean Eusko Legebiltzarrean, Petronorrek Muskizen eta meatzaldean eragiten dituen osasun kalteei buruzko zalantzak argitzeko.

Herreroren esanetan ez dago "inolako ebidentziarik" esateko Muskizko findegiak eragin kaltegarria duenik herritarren osasunean. Petronor inguruan dauden Meatzaldeko udalerrietako osasun adierazleen inguruan galdetu diote. Izan ere, horien arabera, minbizi kasuak eta beste gaixotasun batzuk, esaterako arnasketari eragiten dienak, batez bestekoa baino gehiago dira.

Baina Herrerok tabakismoa, haur-obesitatea, errepideak eta beste faktore batzuk nabarmendu ditu, errealitate sozioekonomikoaren arabera emakumezkoei eta gizonezkoei "ezberdin" eragiten dietenak, eta esan du Meatzaldeko gaixotasun tasa altua "faktore anitzek eragindakoa" dela. Gainera, ziurtatu du Ezkerraldean edo enpresarik ez dagoen beste toki batzuetan ere antzeko kopuruak egon daitezkeela. Bere esanetan "ezinezkoa" da jakitea Petronorren jarduerak erlaziorik ote duen gaixotasun horiekin. Herrerok, baina, aitortu du Jaurlaritzan "kezka" sortu duela gaiak.

Duela hiru hilabete, otsailaren 26an Petronorren izandako bentzeno isuri batek alarma jo zuen Muskizen. Eusko Jaurlaritzak herritarrei "gomendatu" zien ahal zen guztietan barruko eremuetan egotea eta aire libreko jarduerak saihestea. Petronorrek, baina, ziurtatu zuen ez zuela kalterik eragin eta isuria "kontrolpean" izan zuela.

"Bizi-ohitura osasungarriak"

Astelehen honetako legebiltzarreko saioan, EH Bilduk Muskizen eta Abanton ikerketa epidemiologikoa egiteko ez legezko proposamena aurkeztu du, baina EAJk eta PSE-EEk atzera bota dute osoko helegitea jarrita.

Bi talde horien botoekin onartutako testuak Jaurlaritzari eskatzen dio Araba, Bizkaia eta Gipuzkoako "bizi-ohitura osasungarriak" sustatzea eta gaixotasunak prebenitzeko ekintzak burutzea.