Egurra material naturala izaki, bere abantailak eta desabantailak dituela adierazi du artisauak: “Egia da denborarekin usteldu egin daitekeela, errazago apurtu edo sitsa sartu dakiokeela… baina, beste aldetik, plastikoak eta beste material batzuek ez duten goxotasuna eta berotasuna ditu egurrak, ukimenera ere beste zerbait ematen du”. Garai batean, bereziki plastikoa gailentzearekin, zurezko materialak nahiko baztertuak gelditu ziren, baina Pikatzak dio azken urteetan berreskuratzen ari dela zurarekiko interesa, eta geroz eta eskola gehiagotatik egiten dizkiotela eskaerak. “Horretan ere zortea izan dut, gaur egun plastikoa pixkanaka kentzeko eta zuraren aldeko apustua egiteko joera baitago”.

Laudioko tailerrean modu artisauean egiten du lan Pikatzak, eskuz, eta zura mozteko eta eskuila pasatzeko makina sinple bat besterik ez du bertan. “Lehen, altzariak eta horrelakoak egiteko, zur trinkoa erosten nuen gehiago, baina jolasetarako egur kontratxapatua erabiltzen dut, bata besteari itsatsita dauden xaflak dira”, azaldu du. Gaineratu duenez, ez da erraza formatu horretan bertako zura topatzea, eta, gainera, edozein egurrek ez du edozertarako balio. “Garai batean baserrietan botatzen zen egurra, bagenekien nondik zetorren eta noiz bota zen, baina gaur egun egur kontratxapatua erosten diegun biltegi handiek kanpotik dakarte”, dio. Europa iparraldetik dakarten urki egur kontratxapatua da nagusi, azaldu duenez. “Azkenean, hautuak dira: bertako egurra erabili nahiko banu, beste gauza batzuk egin beharko nituzke”, gehitu du.

Herriz herri zurezko jolasekin

Dagoeneko ehun eskola ingururekin hartu-emanean dago Sagutxiki proiektua eta zabaltzen segitzen du. Kalaka jokuekin, berriz, herriz herri ibiltzen da Pikatza. “Zurezko jolasekin plazaz plaza ibiltzen gara, eta dinamizazio lana egiten dugu”. Zurezko hainbat joko eta material eramaten dituzte, eta tailerrak eta dinamika eskaintzen dituzte, eskaeraren arabera. “Gurasoek asko eskertzen dute, pantaila barik zurezko jolas hauekin haurrak oso gustura aritzen direlako”, amaitu du.