Araba Bizirikek Oiongo Udalaren erabakia ere gaitzetsi du: "Oiongo Udalak Labraza zentral eolikoa eraikitzeko plan berezia ilegalki onartu zuen". Iñaki Lasagabaster, Euskal Herriko Unibertsitateko Administrazio Zuzenbideko katedradun emerituaren adierazpenak eman dituzte argudio gisa: "Lasagabasterrek pasa den urtean esan zuen udalek ezin izango dituztela plan berezi horiek onartu, Lurraldearen Antolamendurako Artezpideen aurkakoak izango liratekeelako, eta jardun hori legez kanpokoa izango litzatekeelako, eta erabat deusezak diren plan bereziak ere bai. Esan zuen udalak ez daudela behartuta plan berezi horiek onartzera; aitzitik, behartuta daudela ez onartzera”. Lasagabaster EAEko Arbitraje Batzordeko kide izan zela (1997-2003 eta 2003-2009) nabarmendu dute, eta organo hori arduratzen dela EAEko erakundeen eta lurralde historiko bakoitzeko erakundeen artean sor daitezkeen eskumen-gatazkak ebazteaz.

"Udalei exijitzen diegu plan bereziak ez onartzea"

"Araba arrisku bizian" dagoela baloratu du Araba Bizirikek, 100 proiektu baino gehiago martxan daudelako une honetan. Horren aurrean, udalei "exijitu" diete "tokatuko zaizkien plan bereziak ez onartzea", eta instituzioei dei egin diete "Arabako lurraldea defendatzeko".

Makroproiektu berriztagarriak ustezko trantsizio energetiko baten izenean egiten dira, baina Araba Biziriken arabera, makroproiektu horien helburua beste bat da: "Gero eta argiago dago benetako asmoa dela Arasurren eraikitzen ari diren eta Araba osoak adina elektrizitate kontsumituko duen makro-datu-zentroa hornitzea; eta Repsolek, Josu Jon Imaz Trumpen ipurgarbitzaileak zuzentzen duen enpresak, hidrogeno berdea Europara esportatu ahal izatea".