Apirilaren 30eko prentsaurrekoa, Marieneako lurretan.

ELB, Lurzaindia eta Ostia sareak ekintza sinbolikoa burutu dute apirilaren 30 honetan: Kanboko (Lapurdi) Marieneko lurrak irauli dituzte, maiatzaren 17an barazkiak landatzeko gisan. 

Bertako 3,5 hektarea lurrak laborantzarako gelditzea nahi dute eta borroka horretan urrats bat gehiago egin dute apirilaren 30 honetan. parean, lur horietan etxebizitzak eraikitzeko proiektua dauka Bouygues Immobilier agentziak, eta Kanboko Herriko Etxea horren alde da.

Maiatzaren 17an, goizeko 11:00etan, bi manifestazio abiatuko dituzte Kanbotik eta Itsasutik (Lapurdi), Marieneko lurren osotasuna bi herrien artean banandurik delako. "Elkartze, aldarrikapen eta festa momentu garrantzitsua izanen da", antolatzaileen arabera, eta herritar guztiei luzatu diete landaketan parte hartzeko deia. Manifestazioaren eta herri bazkariaren ondotik abiatuko dituzte landaketak. Ekintza horri babesa erakutsi die Kanboko herriko kontseiluko oposizioko Nahi Dugun Herria zerrendak, CADE Ingurumenaren Aldeko Elkarteen Kolektiboak eta EHZ festibalak.

Aldarrikapenak azaltzearekin batera, antolatzaileek azpimarratu dute ez dietela uko egiten etxebizitza eskubidea bermatzeko politikei, baina Kanboko Herriko Etxeak harturiko norabidea dutela kritikatzen: "Badakigu Kanbon eraikin huts nahikoa badela berritzeko etxebizitzaren beharrari erantzuteko, (…) baina horretarako borondate politikorik ez da".

2014an abiatu zuten laborantza lur horien artifizializazioaren kontrako borroka. Urtez urte, hainbat ekintza burutu dituzte, baina oraingoz Kanboko Herriko Etxeak ez du atzera egiteko intentziorik erakutsi.