Egitasmoaren bi bultzatzaileak baserrian jaioak ziren eta bazuten harremana lehen sektorearekin, baina ahabien ekoizpena berria zen bientzat. “Lagun batek aipatu zigun nola hasi zen entzuten elikagai oso onuragarriak zirela ahabiak eta etorkizunera begira aukera on bat izan zitezkeela”, dio.

Horrela, Kantabriako ahabi-ekoizpen proiektu batekin harremanetan jarri ziren, lan nola egiten zuten ikasi zuten, eta Aramaion landatu zituzten bi hektarea. “Kantabrian denetik egiten zuten, ekologikoan eta konbentzionalean, baina guk hasieratik argi genuen ekologikoan egin nahi genuela lan, elikagai naturala nahi genuelako eta ekologikoa izateak produktuari balio gehigarria ematen diolako ere bai”.

Ahabiak bere horretan, freskoan nahiz izoztuta saltzen dituzte, baina eraldaketak ere egiten dituzte, zukua eta marmelada: “Kuartangoko Ekotarriko obratzaile txikian egiten ditugu eraldaketak: zukua, marmelada azukre barik eta azukrearekin, eta izoztutako ahabiak bost kiloko formatuan”. Ahabia jendeak asko estimatzen duen produktua dela dio aramaioarrak, gauza nahiko berritzailea delako, agian. Baina ekoizpenak lan handia duela dio, “gogo handiarekin hartu beharreko zerbait” dela.

Bisita gidatuak lursailetan

Berriki, ekoizpenean bisita gidatuak antolatzeari ekin dio Ibargurenek. “Jendeari gustatzen zaio esperientzia moduan bisitak egitea, ikustea zer egiten dugun, lan nola egiten den, zein produktu ditugun…”. Bisitariak zuzenean ahabiak biltzen aritzen dira lursailean, eta horretan ari direla ematen dizkie Ibargurenek azalpenak, tokian bertan. Eta, noski, bisitaren ondoren dastaketarako aukera ere izaten dute hurbildutakoek.

Zuzeneko salmenta lehenesten du ekoizleak eta batik bat inguruko denda txikietan banatzen du produktua. “Aramaio inguruan, Arrasaten, Bergaran, Gasteizen, Durangon… inguru guztian egiten dut banaketa”, dio.