'Ilargia eta landareak agenda' urtero argitaratzen du Jakoba Errekondok.

“Baratzea ezarri du denen bizitzen erdigunean, izan hirian, izan baserri guneetan”. Horrela goraipatu dute Rikardo Arregi Kazetaritza Sarien epaimahaikideek Jakoba Errekondo agronomo eta paisajistak hamarkadetan egindako lana. Azaroaren 26an Rikardo Arregi sarien ohorezko mugarria jasoko du usurbildarrak, baratzearen inguruko jakintza Euskal Herriko hamaika txokotara zabaltzen egindako ibilbide luzeagatik, Andoaingo Udalak ohar batean aurreratu duenez.

ARGIAko eta Bizi Baratzeko irakurleek jakingo dutenez, Jakoba Errekondok 30 urte daramatza astero-astero lurrari lotutako gaiak lantzen astekariko Bizi Baratzea atalean. Hain zuzen, 2025a urteurrenez beteta izan du Errekondok: ARGIArekin argitaratutako Bizi Baratzea liburuak ere 10 urte bete ditu, eta ospakizun artean kaleratu dugu Bizi Baratzea Orria ere, urtaro bakoitzean lurrari begiratzen dion aldizkari berezia, Errekondoren artikuluak ere barne hartzen dituena. Gainera, Rikardo Arregiko ohorezko sarituak 40 urte egin ditu larunbat goizetan Euskadi Irratiko Landaberri saioan baratzeko aholkuak emanez. Lurrari, ilargiari eta baratzeari buruzko jakintza bildu eta herrira zabaltzeko lan horregatik guztiagatik saritu dute Jakoba Errekondo.

Azaroaren 26an banatuko dituzte Andoainen Kazetaritza saria eta Komunikazio saria ere, eta bi sari horien launa finalistak azaroaren 5ean, asteazkena, jakinaraziko dituzte. Saridunak hautatuko dituzten epaimahai kideak hauexek dira: Miren Berasategi Zeberio (Deustuko Unibertsitateko irakasle eta ikerlaria), Eneko Bidegain Aire (idazlea eta Mondragon Unibertsitateko HUHEZI fakultateko irakaslea), Itxaro Borda (idazlea eta prentsa kolaboratzailea), Angel Erro Jimenez (idazlea, itzultzailea eta prentsa kolaboratzailea), Pantxika Maitia (kazetaria), Libe Mimenza Castillo (UPV/EHUko irakaslea eta ikerlaria), Marta Lasa Goñi (mahaiburua eta Andoaingo Udaleko Euskarako zinegotzi arduraduna), eta Arantza Aguado Perugorria (idazkaria eta Andoaingo Udaleko Euskara teknikaria).