Getxo eta Portugaleteko Ibaizabal itsasadarra zeharkatuko lukeen ibai azpiko autobidea eraiki nahi du Bizkaiko Foru Aldundiak, baina obrak aurrera eramateko, ezinbestekoa zaio 2023ko abenduan argitaratutako Ingurumen Inpaktuaren Adierazpena (IIA)  aldatzea. Izan ere, adierazpenak erabat baztertzen du leherketen erabilera, eraikin sentikorretan "ondorio onartezinak" sortzen zituelako. Hasiera batean ez zuten leherketarik egitea aurreikusten Artaza-Romo Institutua gertu dagoelako, baina iritziz aldatu dute, "zarataren eta bibrazioen legezko mugak gaindituko lituzketen arren", plataformak salatu duenez.

Hori horrela, giza-katea antolatu dute arratsalde honetako Artaza-Romo Istitutuan, hain zuzen ere gune hori litzatekeelako "gehien kaltetua osasun aldetik".  Leherketen ahalbidetzeko nahia salatu nahi dutela adierazi dute, eta azpimarratu dute adin txikoak bereziki zaurgarriak direla horrelako azpiegituren aurrean. Hala jaso du Naizek plataformako kide Hodei Rodriguezi eginiko elkarrizketan. 

Leherketek sortuko lituzketen arazoen berri eman du Subflubiala ez! plataformak: "Leherketek PM2.5 partikulen, gas toxikoen eta mikroorganismo patogenoen gisako kutsatzaileen eragina areagotu dezakete". Salatu dutenari segi, bereziki kaltegarriak izango lirateke "arnas gaixotasun kronikoak, hala nola asma, bronkitisa edo fibrosi kistikoa dituzten ikasleentzat".

Hirukak jaso duenaren arabera, egitasmoaren aurkakoek diote ohartarazpen horien aurrean aldundiak "kontingentzia planik" edo  "prebentzio-protokolorik" ez duela aurkeztu eta "jendearen osasunaren kontura" ari direla sustatzaileak.

Apirilaren 4an giza-katea

Giza-katea Artaza-Romoko institutu parean egitea aurreikusten dute, hori delako "osasun aldetik kaltetuena" izango den gunea azpiegitura aurrera joanez gero.

Halaber, mugikortasunari eta garraioari buruzko azterketa sakona egitea eta ikasleak eta auzokoak babesteko neurriak hartzea eskatuko dutela jakinarazi dute. "Gure komunitatearen osasuna eta segurtasuna jokoan daude" adierazi du plataformak giza-katearen parte izateko deia zabaltzearekin batera.