Tuterako El Culebreteko hondakinen zentroa.

Mankomunitatea kudeatzen duen SCPSA elkartearen Kontseiluak onartu ditu proiektuaren kontratuaren aldaketa eta eraikuntza epeak, UPNren kontrako botoekin. Hondakinen zentroak balioko du Iruñerriko hondakinak biltzeko. Mankomunitatearen arabera, aitzindaria da Espainiako Estatuan eta Europako onenetakoa izango da.

Aldaketekin proiektua %33 garestitu da: hasieran 66 milioi euro ziren eta orain 88 milioi, gehi BEZa. UPN proiektuaren aurka egon da hastapenetik eta igoera hau gogor kritikatu du, “kudeaketa txarraren ondorio da eta guztiz neurriz kanpokoa”.

Proiektuak 2016an hasi zuen bere ibilbidea, orduan Nafarroako Legebiltzarrak egin zuen Nafarroako Hondakin Planari egokitzeko. Onartu, dena den, 2021ean onartu zen proiektua, baina eraikuntza lanak 2023ko irailean hasi ziren. Besteak beste, hainbat taldek jarritako helegiteek atzeratu dituzte eraikuntza lanak. Ondo bidean, 2026arekin bat hasiko da martxan hondakinen gunea.

Hainbat faktorek ekarri dute aurrekontuaren igoera Mankomunitatearen arabera, batez ere hondakinen eta ingurumenaren arautegi berrien eskakizunetara egokitu beharrak. Hainbat alorretan egin behar izan dituzte egokitzapenak: suteen aurkako segurtasunean, hondakin organikoa eta biometano produkzioaren isolamendu gaietan, edota, besteak beste, lan segurtasunaren eremuan, Diario de Noticias-ek argitaratu duen arabera.

Mankomunitatearen aurreikuspenen arabera, etorkizunean biztanleria handiagoa izango da eta hondakinen kopurua ere bai. Era berean, hondakinen sailkapena ere handiagoa izango da eta horiek guztiak landu ahal izateko tratamendu linea berriak eraiki beharko dituzte. Horren ondorioz, material gehiago birziklatu ahal izango dutela uste dute mankomunitateko arduradunek.

Bestelako kritikak hondakinen zentroari

Ez da UPN hondakin zentroarekin kritiko izan den eragile bakarra. Eskuineko alderdi kritiko agertu da beti, baina inongo alternatibarik aurkeztu gabe.Sustrai Erakuntza elkartea eta Nafarroako hondakinetan lanean diharduen 3R-en Konpainia ere kritiko agertu izan dira hondakin gune berriarekin, batez ere hondakinen tratamendu zentralizatua dakarrelako, haien ustez, hondakinen politika arrakastatsua egiteko klabeetakoa zentroen deszentralizazioa denean. 2018an txosten hau egin zuen Sustrai Erakuntzak bere proposamena plazaratzeko eta beste hau 3R-en Konpainiak. Halaber, 2021ean bi elkarteen artean Nafarroako hondakinen tratamendurako azterketa zabala.