Gipuzkoako McDonald’s-ik handiena Donostiako Aldapeta Maria ikastetxe parean irekitzeko baimena eman du udalak.

Gipuzkoako McDonald’s-ik handiena Donostiako Aldapeta Maria ikastetxe parean irekitzeko baimena eman du udal gobernuak, eta atzera egiteko eskatu dio bertako hezkuntza komunitateak, ARGIAn kontatu genuenez. Horren harira, Donostiako Udalbatzan bi mozio aurkeztu ditu astearte honetan Elkarrekin Podemos taldeak. Lehenengoa onartu egin dute: Jaurlaritzari eskatzea ikastetxeen eta nutrizio-balio eskaseko produktuak eskaintzen dituzten establezimenduen artean nahitaezko gutxieneko distantzia arautu dezala. Apustu-etxe bat irekitzeko, adibidez, eskola batetik 150 metro baino gehiagora egon behar du EAEn.

Bigarren mozioak nahi zuen Aldapeta eskola ondoko McDonald’s-a irekitzea eragozteko aukera juridikoak eta hirigintzakoak aztertzea, Elkarrekin Podemosen esanetan Hiri Antolamendurako Plan Orokorrean aldaketa eginda horretarako aukerak daudelako. EAJ, PSE-EE eta PP alderdiek, ordea, aurka bozkatu dute, eta “ageriko kontraesantzat” jo du alderdi moreak. Jon Insausti alkateak aurretik esana zuen McDonald’s-ak lizentzia duela eta ireki egingo dutela. Are, bertan jatea edo ez, herritar bakoitzak duen ohitura eta aukera kontua dela ere adierazi zuen: “Lizarra kaleko McDonald’s-a ez bada irekitzen, jendeak utziko dio Parte Zaharrekora edo Garberakora joateari?”.

Zer diote ikerketek?

Elkarrekin Podemosen mozioan aurkezturiko ikerketen arabera, baina, ohitura eta aukera kontua izatetik harago, loturak aurkitu dituzte zenbait elikadura-establezimendu ikastetxetik gertu egotearen, osasunerako hain egokiak ez diren elikadura-ohituren eta gehiegizko pisuaren zein obesitatearen tasa handiagoen artean. 2026an European Jornal of Clinical Nutrition aldizkarian argitaratutako hamasei herrialdetako 61 ikerlanen ondorioak dira. Eta 9,9 milioi biztanleren parte-hartzea duen beste azterlan bat ere aurkeztu du alderdiak: bertan, loturak identifikatu dituzte elikagai ultraprozesatuekiko esposizio handiagoaren eta hainbat osasun-arazoren artean.

“Ez gara konformatuko”

Saltokia irekitzearen aurka borrokan den Lizarra kaleko komunitateak positibotzat jo du lehen mozioa onartu izana, baina argi utzita ez dagoela bigarren erabakiarekin konforme: “Ez da inolako ekimenik abiatu McDonald's honetarako. Eskatutako araudi horiek iritsi bitartean, adingabeek arriskuan jarraituko dute”. Jakinarazi dute alkateari hainbat ideia eta proposamen helarazi dizkiotela McDonald’s-aren irekiera bertan behera uzteko. “Bere erantzunaren zain egongo gara”.