Leioako ikasleek eurek diote, Lehen Hezkuntzako ikastetxetik (non catering sistema duten) institutura igarotzen direnean, aldaketa handienetakoa jatekoa dela eta askoz hobeto jaten dutela; hala azaldu diote ARGIAri ikastetxetik. Ez alferrik, urtetako esperientziak erakutsi die institutuan bertan sukaldea izateak eta sukaldariek jana bertan prestatzeak catering sistemak baino emaitza hobeak ematen dituela. “Oso gustura” daude egungo sistemarekin, ziurtatu digutenez.

Horregatik, eraikin berri batera igaro behar diren honetan, Hezkuntza Sailari eskatu zioten sukaldea mantentzeko. “Baina ezezkoa jaso dugu bueltan, office sukaldea edo kanpoko cateringa izango dugula, eta zurrumurrua iritsi zaigu asmoa dela zonaldekako sukaldeen alde egitea, alegia, Leioako beste ikastetxe baten inguruan sukalde erraldoia ezartzea, hainbat ikastetxerentzat. Dena den, ofizialki ez dugu inolako informaziorik jaso”.

Gaur egun, sukaldeak eta jantokiak Derrigorrezko Bigarren Hezkuntzako lehen, bigarren eta hirugarren mailako 260-270 ikasle ingururi ematen diote zerbitzua. “Galera honek ikasleek jaten duten elikagaien kalitatean” eragingo lukeela argi dute. Eta ez hori bakarrik, ikasleekin bertan kozinatzeko baliabide gisa erabiltzen dute sukaldea. “Etorkizunean sukaldearekin loturiko proiektu berritzaileak martxan jartzeko aukerak desagerraraziko lirateke”.

Martxan diren obrek ez dute sukaldea aurreikusten eta printzipioz 2027-2028 ikasturtean aldatuko dira bertara, baina aldarrikapenari eta itxaropenari eusten dio institutuko Organo Gorenak: “Gure ustez, institutuaren eraikin berriak sukalde propioa izan beharko luke, eta hori posible egiteko beharrezko aldaketak martxan ipini ditzala eskatzen diogu Hezkuntza Sailari”.