Analisian nabarmendu dutenez, aldaketa, batez ere, eguzki-energiaren hedapen azkarrari zor zaio. Oro har, haizeak eta eguzkiak EBren argi-indarraren % 30 sortu zuten; erregai fosilek, berriz, %29.

Hidroelektrikoa barne hartuta, berriztagarriek EBko elektrizitate guztiaren ia erdia sortu zuten. Hala ere, ohartarazi dute klima-aldaketa arriskuan jartzen ari dela energia hidraulikoaren ekarpena. Hain zuzen, iaz hidroelektrikoa jaitsi egin zen, eta gas naturalak bete zuen uraren hutsunea. Gas naturala, ordea, fosila izateaz gain, inportatu egin behar da, eta garestia da. Egileen esanean, Europa zaurgarri egiten du, eta mendekotasun hori gutxitzea gomendatu dute.

Alde horretatik, positibotzat jo dute baterien hedapena. Haiei esker, ilundutakoan izaten den eskaeraren zati bat bete daiteke, eta, hala, erregai fosilekiko mendekotasuna murrizten da, eta prezioak egonkortzen dira.

Hala eta guztiz ere, Global Carbon Budgeten kalkuluen arabera, Europan iaz ez ziren karbono-isuriak jaitsi, igo baizik (% 0,4ko igoera, 2024arekiko).