"Cluster Vitoria 30kV" proiektuko mapa bat. Borobil gorriak dira proiektuak aurreikusitako sei haize errotak.

Arabako Mendiak Askek jakinarazi duenez, urtarrilaren 26an sinatu zuen Arabako Industria, Trantsizio Energetiko eta Jasangarritasun lurralde-ordezkari den Javier Aizpuru Ochoak proiektu honen espedientea artxibatzea (hemen dago eskuragai dokumentua). Beraz, proiektua bertan behera geratu da. Horregatik, makroproiektu berriztagarrien aurkako borrokan ari den kolektibo honek "berdez markatutako egun" gisa nabarmendu du data, "Arabako lurraldea, herritarrak eta udalerriak eta udalak defendatzeko lanean diharduten elkarte, plataforma, erakunde eta pertsona guztientzat". Lorpen" gisa ospatu du, eta azken aldian itxi diren beste proiektuak ekarri ditu gogora: Cantoblanco eta Laminoria zentral eolikoak edo PSFV Vitoria eta PSFV Vitoria Solar zentral fotovoltaikoak.

Zergatik ukatu dio Jaurlaritzak ingurumen baimena proiektu horri?

2025eko apirilean jarri zen herritarren eskura Cluster Vitoria 30kV proiektua (hemen dago ikusgai). Enpresak atzera egiteko eman duen argudioa izan da Jaurlaritzak urtarrilaren 16an proiektu honi jakinarazitako ingurumen eraginen adierazpena negatiboa izan dela. Ingurumen kalteak baloratzerakoan, argudio hauek nabarmendu ditu Jaurlaritzak, proiektuari argi gorria emateko: "Ingurune horren ingurumen-sentsibilitate handia, hegazti babestuek espazio hori maiz erabiltzen dutela, habiak egiteko dentsitate handia dagoela, koloniak, etzalekuak eta faunaren babeslekuak direla, talka egiteko arrisku handia dagoela, hainbat proiekturen helburuetan ondorio kaltegarriak izan ditzakeela (Arabako Lautadako Hariztien Uharteko KBE, Arabako Lautadako Hariztien KBE, Natura 2000 Sareko Zadorra sistemako urtegiak eta Entzia KBE), hesi-efektua, eremu horretan dagoen korridore ekologikoaren gaineko eragina, habitaten aldaketa eta inpaktu handia. Horiek denek proiektua ingurumenaren aldetik bideraezintzat jotzea eragiten dute, baita ingurumen-inpaktuaren azterketan jasotako prebentzio-, zuzenketa- eta konpentsazio-neurriak edo beste batzuk ezarriko balira ere". 

Arabako Mendiak Askek ospatu du enpresak atzera egiteko argudioa ingurumen txostena izan dela, eta zera gehitu du: "Araba ingurumen-aberastasun ikaragarria duen lurralde bat da. Euskadiko Natura Sarean dauden 59 eremuetatik, 29 Araban daude (%56,5). Beraz, ez da harritzekoa halako proiektu bat baztertu izana, ingurumenarengan eragin ditzakeen ondorioengatik. Berdin dio non eraiki nahi dituzten makroproiektu eoliko eta fotoboltaikoak. Arabako lurralde osoan zehar hainbeste babestutako eremu daudenez, ingurumen-kaltea onartezina izango litzateke".

Proiektuaren aurka orain arte egin diren mobilizazioak eskertu ditu Arabako Mendiak Askek: "Eskerrak eman nahi dizkiegu proiektu honen aurka aktiboki mobilizatu diren beste plataforma, elkarte, pertsona eta erakundeei. Haien lankidetzari esker proiektuaren aurkako hainbat alegazio sinatu eta aurkeztu dira, eta beraiei esker ere, proiektua behin betiko baztertzea lortu da". Bide berean lanean jarraitzeko deia egin du: "Albiste on honek lasaitzera eraman behar ez gaituela gogorazi nahi dugu. Horrela, gaurkoa bezalako albisteetaz gozatzen jarraitu ahal izango dugu. Gure lurraldeengatik. Gure udalengatik. Gure jendeengatik. Arabagatik".