Donibane Lohizuneko zubia blokatu dute Hego Lapurdiko 50 traktorek igandean, behien DNK eritasunari loturiko arauen «desmasia» eta «sarraskia» salatzeko.

Ostiralaz geroztik daude arazoak Okzitaniako Tolosa eta Baiona artean, autobide-konpainiak ohartarazi duenez, nekazarien protestak medio. Frantziako Gobernuak dermatosi nodular kutsakorraren aurka burutu asmo duen protokoloaren kontra ari dira protestan abeltzainak, ustiategi bateko abelburu guztiak sakrifikatzera behartuta daudelako positibo bat azaleratzen bada. Hain justu, gobernua astelehen honetan hasiko da eritasunaren aurkako txertoak jartzen. "Abeltzainekin batera egingo diogu aurre erronka honi", adierazi du Frantziako Nekazaritza ministro Annie Genevardek: "Ahalik eta lasterren milioi bat animaliari txertoa jarriko diegu, hori baita gaixotasunari aurre egiteko modua; txertaketa hau erabakigarria da, ganadua hiltzea saihesteko daukagun itxaropen-bide bakarra".

��Behien DNK: blokatzeak segitzen du Beskoitzen A64an, ministroak hiltzeez "eztabaida irekia" dela dio

Behi tropa osoen hiltzea salatzen dute; Annie Genevard laborantza ministroak atea ireki du protokoloa aldatzeari.https://t.co/KWtf3mKYpd pic.twitter.com/Ot747CEa0V

— Euskal Irratiak (@euskalirratiak) December 15, 2025

ELBk deituta, hainbat protesta egin dira egunotan Euskal Herrian, Urruñan, Donibane Lohizunen, Beskoitzen eta Donapaleun tartean. DNC, masakreari stop lelopean mobilizatu dira, "sinbolizatzeko politika eta errepresio horiek ofizioa sutan eta odoletan ezartzen dutela", irakur daiteke, ELBk ostiralean zabaldutako oharrean, Donapaleun 200 lagun bildu zuen protestaren harira. "Ariège herrialdean 208 behi tropa baten hilketa manatua izan da", dio idatziak. "Mobilizazio azkar bat antolatua izan da, sindikatu guziak bateraturik, herrialde desberdinetako laborariek bidea eginik etxalderaino eta sozietate zibilaren sustenguarekin. Berriz ere, estatuak polizia errepresio bortitz baten bidez erantzun du, Doubs herrialdean bezala. Azkenean, bi egunen borroka luze baten ondotik eta administrazioaren presioaren pean, behi troparen jabeek, akituak eta ondorio latz batzuen beldurrarekin, galdegin dute mobilizazioa altxatzea eta behien hilketa goiz huntan iragan da".

ELBk salatu du estatuaren indarkeria "oroz gainekoa" dela: "Gertakari zientifikoak, hazleak eta herritarrak mespretsatuz, estatua politika larderiatsu, bidegabe eta ez-eraginkor batean tematzen da". Eritasuna Ipar Euskal Herrira "lanjeroski" ari dela hurbiltzen nabarmendu du, eta laborariek kontra egingo diotela abelburuen masakreari. "Beste politika sanitario bat posible da eta ez dugu holakorik gertatzera utziko gure etxaldeetan", adierazi du sindikatuko bozeramaile Julen Perezek, eta Enguerrand Knecht kideak gehitu: "Hegazti gripea eta tuberkulosiaren bortitz eta zentzurik gabeko politika sanitarioak gibelarazi dugu, DNK-rena ere gibelaraziko dugu".

Testuinguru honetan, ELB eta Confédération Béarn-eko laborariak prefetarekin bilduko dira astelehen arratsaldean, euren aldarrikapenak Nekazaritza Ministerioari helarazteko eskatzeko, besteren artean.