Pesticide Action Network sareak eskaturik, Frontiers in Public Health aldizkari zientifikoak bideraturiko ikerketak zera dio: urtero munduan 11.000 hiltzen dira pestizida intoxikazioagatik, horietarik %60 Indian izanda. Baina orokorrean, urtero 402 milioi eta 433 milioi lagun inguruk dute intoxikazio kasu gogorra jasaten, hau da, munduko laborarien %46ak. Asia hegoaldea, Asia hego-ekialdea eta Afrika ekialdea dira gehien hunkiak, Burkina Fasok duelarik muturreko egoera, nekazarien % 84 kaltetuta izanda.

Emaitzak esku artean, bere kexua eta kezka plazaratu ditu Pesticide Action Network Indiako zuzendari exekutibo Jayakumar Chelatonek: "Krisi horri dagokionez, ez ikusiarena ezin da gehiago egin".

3,8 milioi tona pestizida erabili ziren 2023an –1990ko bikoitza–. Hori horrela, ekoizpen eredu aldaketa sustatzeko politikak eta laborariak horretara bideratzeko laguntzak ezinbestekotzat dituzte ikerleek. Jakinda gainera, zenbakiak altuagoak direla errealitatean, hain justu, epe luzeko ondorioak ez dituztelako kontuan hartu.

2006tik 2023ra arteko tartea harturik, guztira139 herrialde ikertu dituzte; horietatik 77etan OMEren Hilkortasunari buruzko Datu Basearen datuetan oinarrituta eta beste 62ei dagokionez, plazaraturiko artikuluak azterturik.