Sustraiak Habitat Design aholkularitza proiektuko kideen laguntza izan zuten arabarrek lursaila diseinatzeko. “Bertako herritarrek esaten ziguten lursaila ez zela oso emankorra, eta horri buelta eman nahian ari gara: bideak eta eremuak sortu genituen, keyline diseinu hidrologiko bidez antolatu genuen saila, urmaela sortu genuen ura jasotzeko…”. Lursail bateko ur baliabideak ahalik eta gehien aprobetxatzeko diseinuak egitean datza keyline metodoak, eremuak banatzen ditu eta horietako bakoitzean hainbat elementu estrategikoki txertatzen ditu.

Aukera Natura proiektuan lau bat hektarea ari dira lantzen. “Lau eremu handitan antolatu dugu lursaila, eta horietako bakoitzean hainbat barietatetako fruta arbolak landatu ditugu”. Eremu batean pistatxoak, hurrondoak eta olibondoak dituzte; beste batean intxaurrondoak; erdiko gunean sagarrak, udareak, gereziak, arbendolondoak, haranondoak eta antzekoak; eta azken batean masustondoak. “Guztira 220 bat fruta arbola daude, eta eremu horiez gain, ortua egiteko beste zati zabal bat ere badugu”, azaldu du Lopez de Susok. Urmaela lursailaren erdialdean dago, eta proiektuko kideek diote ikusgarriak direla inguruan sortzen ari den landaredia eta erakartzen dituen animaliak.

Jolasak eta aplikazioa

Momentuz ekoizpen txikia dute Kuartangoko sailean, izan ere, kanpoan egiten dute lan bi kideek, eta haien denbora librea eskaintzen diote proiektuari. “Garaiko barazkiak ekoizten ditugu, batik bat etxerako, familiarentzako eta lagunentzako”. Oilategi mugikorra ere badute bertan: “Nekazaritza birsortzailean animaliekin ere egiten da lan, lurraren egoera hobetzen lagundu dezaketelako, ongarria zabalduta adibidez”.

Oraindik hasierako fasean eta probak egiten ari dira, baina aurrera begira inguruko kontsumo taldeekin lan egiteko aukera dute buruan. Bisita bereziak antolatzeko ideiari ere bueltaka ari dira: “Joko bidezko bisita berezi bat egiten hasi nahiko genuke, jendea taldeetan etortzeko eta scape room moduko bat egiteko lursailean, gure lana erakusteko”. Gonzalez informatikaria da eta orturako eta oilategirako mugikorreko aplikazioa sortu du, edonorentzat eskuragarri. “Oilategian arrautzak jasotzean paperean apuntatzen genuen dena, eta Ikerrek pentsatu zuen mugikorrean datuak jasotzeko zerbait praktikoa sortzea”, amaitu du Lopez de Susok.