Erronkaribarreko batzordeburua zen garaian Egiguren, eta abeltzaintza komisioko lehendakariarekin batera hainbat artzain eskola bisitatzeari ekin zioten. “Katalunian izan ginen, Oñatiko Gomiztegiko eskolan, Aragoiko Sant Chuan de Planen… Pirinioetan artzain eskolak daude han-hemen, eta nola da posible Nafarroan ez existitzea?”, galdetzen zuten. Artzain eskolak ikustearekin batera, Erronkaribarreko abeltzainei bideratutako formazioa ere egin zuten 2023an, haien ezagupenak transmititzen irakasteko. “Eskualdeko zortzi artzainek eta abeltzainek eman zuten izena, eta formazioa jaso eta gero, Aragoiko La Estiva artzain eskolatik ikasleak jasotzen hasi ziren praktikak egiteko”, azaldu du.

2024an beste jauzi bat eman zuten: Artalde Elkartea sortu zuten Egigurenek eta formazioan parte hartu zuten zortzi abeltzainek, proiektuari entitate juridikoa emateko. “Azken urte eta erdi honetan, berriz, artzain eskola proiektua aurrera eramateko lantaldea osatu dugu: formazio ibilbidea lantzen ari gara, 800 orduko hezkuntza plana osatzen hainbat modulurekin eta balore finkoekin”, dio. Marengo Bordako Alba Ripodas artzain eta biologoa eta Jose Berrotz Ezkarotzeko albaitaria batu zaizkio hezkuntza plana osatzeko lantaldean.

Eredu estentsiboa eta agroekologikoa ardatz

Norabide argian ari dira lanean artzain eskolaren bultzatzaileak: abeltzaintza estentsiboaren eta agroekologiaren alde, inguruari lotua egonen den eredua bultzatu nahi dute. “Hemen beti egin den manejua landu nahi dugu, baina gaur egungo erreminta eta metodologiekin, arlo teknologikoari ere begiratuta”. Hainbat modulu landuko dituzte artzain eskolan: abeltzaintza, erreminta teknologikoak, alor psikologikoa, itxiturak, motozerra, soldadura… “Azkenean, hainbat funtziotako hezkuntza eskaintza izanen da, instalatu nahi duenak ezagupen anitzak beharko baititu”.

Erronkariko eskola zaharra berritu eta eskolako aularioa prest dute honezkero, eta helburua da 2026ko urrian lehen promozioarekin hastea. “Ea nola doan dena, denboraz nola iristen garen… azkenean, finantziazioaren alorrak asko baldintzatzen du proiektua”, adierazi du. Aurten, Nafarroako Gobernuaren laguntza jaso dute, baina etorkizunera begira finantziazio bide finkoak bilatzea ezinbestekoa izanen dela dio. Informazio guztia gidarieskola.com webgunean topa daiteke.