Maiatzaren 10ean plazan elkartu dira aranoarrak Ikatz Gane proiektuaren aurka duten iritzia plazaratzeko.

Maiatzaren 10ean argazkia ateratzeko eta haien iritzia zabaltzeko bildu dira Aranoko herritarrak plazan, makroproiektuaren aurka batuta daudela irudikatuz. Honela azaldu dute hedabideetara zabaldu duten mezuan: "Ikatz Gane proiektuak Arano herriko bizitza eta bizimodua erabat kaltetuko lituzke eta natur ondareari, bertako fauna eta iturburuei zuzenean eragingo lieke eta inpaktu izugarria izango luke".

Enigma Green Powerren Ikatz Gane proiektua atzera bota ezean, "Aranorenak egin du", herritar horien ustez: "Ez du inork hemen bizi nahiko edo bertako taberna, mendi edo bestelako zerbitzuetara inguratu nahiko”. Izan ere, Hernaniko lurretan daude aurreikusita haize errotak, baina Aranoko herrigunetik bista bistan eta oso gertu. Herritarrek sentsazio hau dute: “Gure buru gainean izango ditugu beti”.

Herritarrak bizi kalitate galera handiaren beldur

Proiektuak Aranoko bizitzan eta aranoarren bizi kalitatean eragin oso kaltegarria izango duela aurreikusten dute: “Herrigunerako distantzia eta aparatuen dimentsioak kontuan izanda itzala ere egingo luke herriko plazan eta nonahitik entzungo genituzke”.

Horrez gain, bertako megalito eta kultur ondarean, iturburuetan eta fauna eta floran ere "konpondu ezinezko kaltea" izango luketela diote, eta horiek kontuan izanda ari dira Ikatz Gane proiektuaren aurkako elegiteak prestatzen.

Aranoarren %96k sinatu dute proiektuaren aurka

Sinadura bilketa egin dute Aranon, eta herritarren %96k Ikatz Gane proiektuaren aurka eman du bere sinadura, herritarrek duten iritziaren seinale.

Mozioa Hernaniko Udalean

Egoeraren larria ikusita, Aranoko Udalak Ikatz Gane proiektuaren aurkako mozio bat aurkeztu zuen martxoaren 23an Hernaniko Udalean, eta Ereñotzuko Auzo Udalari eta Goizuetako Udalari mozioa babesteko eskatu zien. Mozioa ez da oraindik Hernaniko Udal Batzarretik pasa.

Bitartean, maiatzaren 4an amaitzen zen Gipuzkoan proiektuari elegiteak jartzeko epea (Nafarroan 30 egun luzatu dute epea), Hernaniko Udalak 42 elegite aurkeztu zituen, eta Urumea bailarako herritarrek 3.500dik gora, besteak beste, Urumeako Mendiak Bizirik plataformak sustatuta.