Imanol Pradales EAEko lehendakaria Murgako instalazioetara egindako bisitan.

Aiaraldean egur ekoizpenerako lantoki handi bat irekiko dutela iragarri dute Mondragon Taldeko Etorki eta Lana kooperatibek eta Eusko Jaurlaritzak. Murgan, 95.000 metro koadroko zerrategia jarriko dute martxan bi kooperatibek –13,31 futbol zelai– eta urtean egurra ekoizteko gaitasuna, 80.000 metro kubotik 300.000 metro kubora handituko dute modu horretan.

Astelehenean inauguratu dute instalazioa, Jaurlaritzako lehendakaria Imanol Pradales eta Landa Garapen, Nekazaritza eta Arrantza sailburua Amaia Barredo bertan zirela. Orotara, lantokiak ehun lanpostu berri sortuko dituela aurreikusi dute, "une zaila" bizi duen eskualdean, Pradalesek esan duenez.

Eraikuntzarako materialak eta pelleta ekoizten duen Oñatiko Lanak eta Murgako Etorki zerrategiak hainbat urte zeramatzaten proiektua lantzen, aurten bat egin eta lantokia martxan jarri duten arte, "egurrezko eraikuntza industrializatuaren" merkatuari erantzuna emateko. Horretarako 67 milioi euroko inbertsioa egin dute eta horietatik %20, ia 13 milioi euro, Jaurlaritzak jarri ditu.

Europa hegoaldeko handiena

Inaugurazioan Pradalesek azaldu du lantokian "gertuko" egurra zerratuko dutela: "Etxekoak, etxekoekin, eta etxeko lehengaiarekin", esan du. Lehendakariak ziurtatu du "Europa hegoaldeko zerrategi handiena eta eraginkorrena" izango dela Murgakoa.

Azaldu dutenez "egurra osorik prozesatzeko teknologia aurreratua" dauka lantokiak. Batez ere, baso-landaketetako intsignis pinuaren enborrak eramango dituzte Aiaraldeara, zehazki 60 zentimetro diametro ingurukoak.