"Hernani I" eta "Hernani II" izeneko proiektuek kluster eoliko bakarra osatzen dute eta hauek dira euren titular eta sustatzaileak: lehenarena Premier ESPF Ipaz Haizea, S.L., eta bigarrenarena Premier ESPF Ipaz Haizea 2, S.L. Amasa-Villabonako udalerrian 200 metroko bi haize errota jartzea dute helburu, bakoitza 4,99 MW-ko potentziakoa eta Siemens Gamesa 145-5.0 Mk II modelokoa.

Bertan sortutako energia 11,5 kilometrora dagoen Hernaniko azpiestazioaren bidez lotu nahi dute banaketa-sarera, eta horretarako, aireko eta lurpeko 30 kV-ko linea elektrikoa baliatuko dute: lehen 2,29 kilometroak eta azken 0,94 kilometroak lurpetik egin nahi dituzte, eta tarteko 8,27 kilometroak airetik. Linea honek Amasa-Villabona, Andoain, Urnieta eta Hernani udalerrietako lurrak zeharkatuko lituzke.

9,76 milioi euroko aurrekontua dute zentral eolikoa eta hustuketa-linea eraikitzeko lanek.

Aurretiazko administrazio-baimena eta ingurumen-inpaktuaren adierazpena dira Premier ESPF Renovables S.L. enpresak eskatu dituen baimenak, Industria, Trantsizio Energetiko eta Jasangarritasuneko Gipuzkoako lurralde-ordezkaritzan. Hala argitaratu du irailaren 24an Euskal Herriko Agintaritzaren Aldizkariak. Bertan zehazten denez, aipatutako sailaren Gipuzkoako Lurralde Ordezkaritzaren esku dago proiektu honi aurretiazko administrazio-baimena eman edo ez ebaztea.

Proiektua jendaurrean jarria dago. Hemen ikus daiteke, eta 30 eguneko epea dago alegazioak aurkezteko.

Udalak enpresarekiko harremanak eten zituen uda aurretik

2025eko maiatzean Amasa-Villabonako udalak herritarrei azaldu zien Premier enpresarekin negoziatzen ari zela Amasamendiko zentral eolikoen kokapena, energiaren salmenta eta jabetza (albiste honetan dago jasota).

Urtebetera, 2026ko maiatzean, Amasa-Villabonako udalak jakinarazi zuen Premier enpresarekin harremanak eten zituela (albiste honetan irakurgai). Izan ere, udalaren eskariz ingurumen txostena egin zuen Gipuzkoako Foru Aldundiak eta txosten hori irakurrita udalak ondorioztatu zuen Amasamendiko proiektu eolikoak hegazti espezie babestuengan izango lukeen eragina "oso nabarmena" litzatekeela.