Irailaren 26an Azpeitiko Azoka Plazan aurkeztuko dute Jakoba Errekondo eta Antton Olariaga egileek 2027ko Ilargia eta landareak agenda. Ez da ohiko aurkezpena izango, bertso bazkari berezi bat baizik. Izan ere, hamargarren urtea da bi egileek elkarrekin ARGIAren Bizi Baratzea proiektuko agenda argitaratzen dutena, eta zenbaki biribil hori ospatuko dugu, Lurraren inguruko gaiekin gozatzen dugun jendearekin batera.

Elikaguneak menu ederra prestatuko du: entsalada epela garaiko barazki eta lekaleekin; karrilerak saltsan eta kopa gozoa, jogurtez eta fruta konfituraz osatua. Haragirik jaten ez duenak adierazi izena ematerakoan, beste bigarren plater bat dastatzeko. Umeek pasta eta albondigekin gozatuko dute.

Bertsoz eta ilustrazioz osatutako liburuxka opari

Giro ederrean ahosabaia gozatzeaz gain, begi-belarriak ere kitzikatuko dizkigu ekitaldi bereziak. Jakoba Errekondok sasoiek eta ilargiak landareetan duten eraginaz argibideak emango ditu, baita bertaratutakoen galderak erantzun ere. Antton Olariagak hamar agenda horietarako berariaz egindako hainbat ilustrazio erakutsi eta azalduko ditu, umore finez. Eta Unai Agirre eta Maddalen Arzallus bertsolariek euren bozak elkartuko dituzte: entzungo ditugu haien bat bateko bertsozko ziriak, baita bi bertsolari hauek idatzitako bertso jarrien sorta ederrak ere, eta baita bertso zaharrak ere.

Bertsoak eta ilustrazioak gertutik gozatzeko, elkarrekin kantatzeko eta etxera oroigarri eramateko, liburuxka batean bildu ditugu egun horretan aipagai izango diren ilustrazioak eta bertsoak. Bazkaltiar bakoitzak jasoko du berea.

Plazer duenak 28 euroan du bertso bazkari berezi honetarako txartela, eta umeena 15 euroan. Bizkor ibili, irailaren 20rako eman behar baita izena. Horretarako, badira hiru modu:

ARGIAren Azokan eskaera egitea da aukera bat.

ARGIAra deitzea da beste aukera: +34 943 37 15 45

Eta Elikagunearen dendara joatea da hirugarren aukera, bertan ordaindu eta bazkaltiarren zerrendan idatzita geratuko da zure izena.