Ikasturte berriari abiatuta, Bizkaiko Foru Aldundiak eskola kiroleko programan Bizkaiko Ehiza Federazioak parte hartu du ehiza txakurrekin eta falkoneriarekin –hegazti harrapariekin lotutako erakustaldiak– lotutako jardueretan. Ekologistak Martxan erakundeak salatu du "bateraezinak" direla ehiza eta eskola kirola, azken hau "ikasleen hezkuntza garapena eta ongizatea sustatzeko programa" izanik.

"Ehiza adin txikikoei zuzendutako kirol zein jolas jarduera gisa aurkeztea oso zaila da haurrak babesteko, bizikidetzarako, hezkuntzarako, animaliekiko errespeturako eta indarkeria saihesteko printzipioekin", nabarmendu dute. Haien ustez, haur hezkuntzan Bizkaiko Foru Aldundiaren gisako administrazio publikoek "errespetuan, enpatian, zaintzan eta bizikidetzan oinarritutako ereduak" bultzatu behar dituzte, eta ez "animaliak jazartzea, harrapatzea eta hiltzea oinarri" duen jarduera bat.

Froga zientifikoak

Ehiza ikasturte berriko eskola kiroleko programan sartzeko erabakia justifikatzeko eskatu diote Bizkaiko Foru Aldundiari: "Zein ebidentzia zientifikok justifikatzen du ehizarekin loturiko jarduerak haur eta nerabeentzako programa publiko batean sartzea?". Izan ere, haien esanetan zenbait ikerketek ondorioztatu dute ehizarekin adin goiztiarretan harremantzeak "indarkeria normalizatzea" dakarrela, gatazkak konpontzeko metodo gisa.

"Haurtzaroan animaliekiko indarkeria eta krudelkeria fenomeno garrantzitsuak dira indarkeriaren garapenaren eta prebentzioaren ikuspegitik", adierazi dute. Horren aurrean, taldeak "enpatia eta errespetua sustatzen dituen hezkuntza ereduaren" alde egin du. Gainera, ukatu egin du ehiza "haurtzaroa naturara hurbiltzeko beharrezko tresna" dela: "Naturaren eta animalien gaineko menderatze estereotipoak indartzen ditu".

Eskaerak Aldundiari

Honako eskaera hauek egin dizkio Ekologistak Martxan taldeak Bizkaiko Foru Aldundiari: ehiza eskola kiroleko programatik kentzea; programan sartzekotan, erabaki hori justifikatzeko arrazoi zientifikoak eta pedagogikoak argitaratzea; ehizak haurrak babesteko, indarkeria prebenitzeko, animalien ongizaterako eta balioetan hezteko printzipioekin duen bateragarritasuna aztertzea; eta, azkenik, natura ezagutzeko jarduerak sustatzea, biodibertsitatearen behaketan, kontserbazioan, errespetuan eta babesean oinarrituta.