Abengoa enpresak Sevillan eraikitako zentral fotovoltaikoa.

Espainiako patronal fotovoltaikoaren buru den Benbros Energyk Cañaveras Solar filialaren bidez egingo du proiektua; Rafael Benjumea da bi enpresen zuzendaria. Proiektuaren potentzia –30,9 megawattekoa– eta beste hainbat ezaugarri ezagunak baziren ere, orain ezagutu da elektrizitatea ekoizteko gaitasun hori Agurainen kokatutako 48.960 eguzki-panelen bidez lortuko dela, eta parkearen exekuzioak 15,2 milioi euroko kostua izango duela, El Correo-k jaso duenez.

Azpiegiturak Donemiliagako azpiestaziora bideratuko du energia goi-tentsioko linea baten bidez. Linea hori lurpean joango da zentral fotovoltaikotik sare elektrikora igaro beharreko 4.252 metroetan. Donemiliagatik, Elgeako parkearen azpiestaziora bideratuko da energia. Azazetako parke eolikoa aurrera eramaten bada, Elgeako parkera bideratuko den energia partekatua izango da, Donemiliagako eta Azezetako parkeek sortuko baitute energia. Risen Energy enpresa txinatarrak egindako aurpegi biko panelak erabiliko dituzte proiektuan, eta plaka horiek, eguzkitan egoteko ahalmena duen egitura metaliko baten gainean jarriko dira, iparraldetik hegoaldera.

Benjumeatarrak, Andaluziako oligarken familia frankista

Andaluziako oligarkiaren familia historikoa da Benjumeatarrena. Egun Benbros Energyren zuzendaria eta Unión Española Fotovoltaica (Unef) elkarteko burua da Rafael Benjumea, Abengoamultinazionaleko presidente ohi Felipe Benjumearen iloba. Feliperen osaba ziren Rafael Benjumea, Guadalhorceko lehen kondea eta Primo de Riverarekin ministro izandakoa, eta Joaquín Benjumea, Benjumeako lehen kondea eta Francorekin ministro eta Espainiako Bankuko gobernadore izandakoa.

Frankismo garaian egin zituen negoziorik esanguratsuenak Benjumea familiak. Felipek 1941ean Abengoa enpresa sortu zuen eta bere osaba Rafaelek, RENFEko presidente izendatu eta urtebetera, horren elektrifikazioa hornitzeko baimena eman zion. 80ko hamarkadaz geroztik, "batez ere PSOEren aterkiak babestu zituen Abengoaren interesak, eta konexio politiko-enpresarialen sare trinkoa sortu zen, taldearen hedapena erraztuz", Secretolivo webguneko Élites de poder económico en Andalucía (Botere politikoaren eliteak Andaluzian) artikuluaren arabera.

XXI. mendean familiak negozioak garatzen jarraitu zuen. Estatuko botere politikoa une bakoitzean kudeatzen zutenekin mesede truke ugari egin zituen, maiz ate birakariak baliatuz. Secretoolivoren artikuluaren arabera, " 2002 eta 2011 artean Errege Etxeko buru izan zen Alberto Aza Juan Carlos erregeak enpresan zituen akzioen aurpegi publikoa zen, José María Aznar jakinaren gainean zegoela. Gainera, Azaren semea Abengoako administrazio kontseiluko kide izan zen. Juan Carlosen lehengusua ere kontseiluko kide izan zen".