Erraustegiaren Aurkako Mugimenduaren prentsaurrekoa asteartean, Donostiako Kontxako hondartza ondoan.

Igande honetan Donostiako Kontxa hondartzan ez dira soilik estropadak lehiatuko dituzten arraunlarien aldeko oihuak entzungo, baita Zubietako erraustegiaren eta haren ondorio kaltegarrien kontrakoak ere. Urtero legez, elkarretaratzea deitu du Errausketaren Aurkako Mugimenduak goizean, astearte honetan elkarteko kideek eginiko prentsaurrekoan iragarri dutenez. 

Erraustegi "toxiko, garesti eta alferrikako" hori gelditzea eskatuko dute, besteak beste, eta dei egin diete Gipuzkoako herritarrei protestan parte hartzera. Aurtengo uda "gure historian" markatuta geratu dela azpimarratu dute, "klima aldaketa bere kalteekin" jadanik heldu delako Euskal Herrira: "Beroaldi gogorrak bata bestearen ondotik, pertsona zaurgarrienak beroarekin sufritzen, mendi eta soro eta erreketan inoizko lehorterik larriena, itsasoko uren tenperatura harrigarria, biodibertsitatearen hondamendia, sute izugarriak, eta abar."

Horren harira, elkarteak nabarmendu du jakina dela hondakinen erraustea txarra dela gizakiaren osasunarentzako, baita landareentzako eta animalientzako ere: "Errausketak herritarrok bultzatzen gaitu kontrolik gabe kontsumitu eta botatzera, ez berrerabiltzera, ez birziklatzera". Gainera, erraustegian hondakin guztiak batera errausteak "klase guztietako toxikoak" zabaltzen dituela salatu dute, klima aldaketa okertzen dutenak.

Udako sutea

Prentsaurrekoan gogora ekarri dute abuztuaren 19an sute bat piztu zela Zubietako erraustegian. Horren ondorioz, bederatzi behargin ke toxikoa arnastuta intoxikatu zirela salatu zuen orduan langile batzordeak. "Behin eta berriro gertatzen diren ihes, istripu eta suteek areagotzen dute erraustegiak barreiatzen duen kutsadura", salatu du Erraustegiaren Aurkako Mugimenduak.

Hortaz, elkarteak exijitu dio Gipuzkoako Foru Aldundiari itxi dezala Zubietako erraustegia: "Ez erre gure eta gure ondorengoen etorkizuna!"