Glaziar baten erorketak luizi eta uholde bortitzak eragin zituen duela bi aste Nepal eta Tibet arteko mugan. Ondorioz, azken datuen arabera, Nepalen 1.370 pertsona hil dira eta 5.000 daude desagertuta; Tibeten, berriz, hildakoak 43 dira eta desagertuta daudenak 550. Bada, Nepalgo Gobernuko Shisir Khanal Atzerri ministroak "justizia klimatikoa" aldarrikatu eta konpentsazio ekonomikoak eskatu dizkie munduko herrialde kutsatzaileenei.

Nepalgo Finantza eta Ingurune Ministerioek gutun bat idatzi zioten aurreko astean NBE Nazio Batuen Erakundearen funts bati –2022an sortu zuten larrialdi klimatikoak jotako herrialde txiroei laguntzeko–: zehazki, hogei milioi dolar eskatu dizkio. Erresuma Batuko The Guardian egunkariari asteartean eginiko adierazpenetan, Khalanek esan du aldaketa klimatikoak "gizateria osoari" eragiten diola: "Nazioarteko komunitateak gertakari hau Himalaia bizitzen ari den aldaketa klimatikoaren baitan ulertu beharko luke"

Nepalgo Atzerri ministroak nabarmendu du gehien kutsatzen duten herrialdeak "esnatu" egin behar direla, eta duela bi asteko uholdearen erantzukizuna hartu: "Ekonomia kutsatzaileei etekina ateratzen diete herrialde horiek, eta berotegi efektuko gas gehiago isuri atmosferara".

Klimak eragindako uholdea

Nepalek mundu osoko berotegi efektuko gasen %0,1 isurtzen duen bitartean, haren bizilagun Txina eta India, esaterako munduko herrialderik kutsatzaileenen artean daude: Txina da munduan karbono dioxido gehien isurtzen duena, mundu osoko %33,1 2024an; urte berean, Indiak isurketa globalaren %8 isuri zuen, munduan hirugarren gehien. Ameriketako Estatu Batuak dira arlo horretan munduko herrialdeen artean bigarren kutsatzaile nagusia.

ICIMOD Mendien Garapen Integraturako Nazioarteko Zentroak martxoan eginiko ikerketa baten arabera, Himalaiako glaziarra geroz eta azkarrago urtzen ari dira azken urteetan: zehazki, izotz galeraren ehunekoa bikoiztu egin da 2000. urtetik hona. Horrez gain, NBEk 2023an jakinarazi zuen Himalaiako mendiek izotzaren erdia galdu zutela 1990 eta 2020 artean.