Irailaren 30ean Ozaetako GaraiON Sorgingunean "Su Txikien Itsasoa" ekimena burutko dute, konfluentzia espazio izan nahi duena. Eragile ezberdinen arteko aliantzen garrantzia nabarmendu dute.
Euskal Herriko Eskubide Sozialen Karta osatzen duten eragile ezberdin ugarik agerraldia egin dute Gasteizen «Su Txikien Itsasoa» ekimena aurkezteko. Euskal Herriko eragile sozial eta sindikalen zein herri mugimenduen arteko topaketa-jardunaldi bat antolatu du Eskubide Sozialen Kartak, «guztion arteko harremanak estutu eta sinergiak sortzeko».
«Trantsizio ekosozial justu baterako» ardatz nagusiak eta funtsezko aldarrikapenak zeintzuk diren eztabaidatzeko eta zoru komuna adosteko helburuarekin egin dute deialdia. Trantsizio honen alde modu «ahalik eta koordiantuenean» egiteko agenda sozial partekatua izateaz hitz egiteko parada izango da irailaren 30ean GaraiON Sorgingunean. Data gordetzeko eskatu dute.
Antolatzaileek gonbidapena luzatu dute eztabaida prestatzeko prozesuan parte hartzeko. «Hitz egin eta entzun» logikan oinarritutako prozesu bat jarriko dute martxan, eztabaidaren oinarria ahalik eta eragile gehienen artean eraikitzeko, ondoren irailaren 30ean horiek konpartitu eta sakontzeko. Aipatu dute sinetsita daudela «su txikien itsasoa piztu» behar dugula, trantsizio ekosoziala elkarrekin pentsatu eta horren eraikuntzan elkarrekin ekiteko.
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545
Ekonomia sozial eraldatzailearen sareko kide da ARGIA (Bizi Baratzea). Informazio burujabetza helburu, egunerokoan gauzak egiteko beste modu batean sinesten dugu.
BIZI BARATZEAko edukiak kopiatu, moldatu, zabaldu eta argitaratzeko libre zara, beti ere, gure egiletza direla aitortzen baduzu eta baldintza beretan egiten baduzu.
