“Araba ez dago salgai” eta “Makroproiekturik ez” lelopean egin dute deialdia. Urriaren 26an elkartuko dira 18:00etan “etekin pribatuak bermatzera” bideratuta dagoen eredu energetikoa eta “instituzioek jokatzen duten papera” salatzeko. Gaur, urriaren 17an, prentsaurrekoa egingo dute Gasteizen Escalinatas San Miguelen eguerdiko 12:00etan.
Araba Bizirk-ek elkarretaratzea deitzeko beharra ikusi du “Arabako lurraldea mehatxatzen duten makroproiektuen aurka” daudela adierazteko. Makroproiektu suntsitzaile bakoitzeko, hauei erantzuna emateko, eta lurra defendatzeko prest dagoen mugimendu herritar bat jaio dela diote.
Mugimendu hauetatik 16 bildu dira proiektuen aurkako alegazioak Eusko Jaurlaritzan aurkezteko: Aiaraldeako Mendiak Bizirik, Horrela Ez Valles Alaveses, Horrela Ez Argantzun, Horrela Ez Kuartango, Horrela Ez Gasteiz, Lautadako AHTrik ez, UAGA, Zigoitia bai, Zuia Bidean, Urkabustaiz Babestuz, Dikerik ez, Bionekazaritza, ATACA, Arabako Mendiak Aske, Araba Bizirik, AHTrik ez, eta Valles Alaveses, besteak beste. Alegazio hauek, aurretik etorri diren beste hainbati gehituko dira, guztira 50.000 alegazio izanik.
“Trantsizio energetikoz” mozorroturik, Jaurlaritzak eta Arabako Foru aldundiak herritarrak eta Arabako lurrak alde batera utzi eta enpresarien eskua estutu dutela salatu du Araba Bizirik-ek. “Diruaren morroi” direla argi utzi dutela azpimarratu dute, agintarientzat “Araba merkatua besterik ez” dela esanez.
Biodibertsitatearen suntsiketaz gain, “Landa-bizitzaren aldeko apustua egin duten eta landa-garapen iraunkorreko proiektuak aurrera ateratzen ari diren pertsonak lurraldetik kanporatuak izateko arriskuan” direla ere seinalatu dute. Hainbat herritar behartuak izaten ari bai dira “etxea, herria eta lurra uztera».
Hurrengo urriaren 26ko manifestazioan bat egiteko gonbita luzatu diote “Araba maite» duen eta hura defenditzeko prest dagoen pertsona orori, “erokeria hau” salatzeko. Bertan “enpresa handiei mugak jartzea” eta lurraldearen defentsan “Eusko Jaurlaritzaren eta Arabako Foru Aldundiaren inplikazio irmoa “ exijituko dute.
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545
cc by-sa
Sareko kide
Ekoedizioaren Institutuko bazkide
