Tenperatura altuei egotz dakizkiekeen 207 heriotza izan dira ekainean Hego Euskal Herrian, Carlos III.a Osasun Institutuak kudeatzen duen Eguneroko Hilkortasuna Monitorizatzeko Sistemaren (MoMo) datuen arabera. Bizkaian erregistratu dira heriotza gehien (97); Nafarroan, berriz, 54 izan dira; eta Araban eta Gipuzkoan antzeko zifrak zenbatu dituzte, 30 eta 26, hurrenez hurren.

Horrez gain, uztaileko lehen bortz egunetan 27 pertsona hil dira Hego Euskal Herrian beroak eragindako gorabeherengatik: Bizkaian hamaika, Nafarroan bederatzi, Araban lau eta Gipuzkoan hiru, hain zuzen.

Datu gurutzatuak

Espainiako Gobernuko Osasun Ministerioaren MoMo sistemak analisi matematikoa egiten du tenperaturen eta heriotzen datuak gurutzatuta. Espainiako Estatistika Institutuaren, Justizia Ministerioaren eta Aemet meteorologia agentziaren datuak biltzen ditu, eta estimazio bat egiten du. Ez du heriotzen zifra errealik ematen, eta, gainera, datuak argitaratzen direnetik gutxienez hilabete igaro behar da zifrak guztiz finkatzeko.  

MoMo sistemak eguneroko hilkortasuna aztertzen du kausa guztiak kontuan hartuta, tartean, tenperatura handiei loturikoak. Ez ditu, ordea, bero kolpe batek eragindako heriotzak soilik zenbatzen. Beroaren ondorioz bertze gaixotasun batzuk larriagotzearekin lotu daitezkeen heriotza guztiak hartzen ditu kontuan; gaixotasun kardiobaskularrak, arnasbideetakoak eta giltzurrunetakoak, bertzeak bertze.

Hamaika urte dira sistema martxan jarri zutela, eta, haren arabera, 2015az geroztik 2.600 herritar inguru zendu dira Hego Euskal Herrian muturreko tenperatura altuen eraginez.