"Oiongo alkate Jose Manuel Villanueva Gutierrezek (EH BILDU) Gasteiz irratian adierazi du Labrazako zentral eolikoaren proiektuari obra lizentzia emango diola", eman du jakitera Arabako Mendiak Askek. Egoera hori "oso larria" dela baloratu du: "Labrazako Administrazio Batzarrak proiektua bera eta proiektuari oinarri urbanistikoa ematen dion plan berezia epaiketara eraman ditu, irregulartasun asko daudelako. Oiongo alkateak, horiei kasu eginez, obra-lizentzia geldiarazi beharko luke errekurtso horiek auzitegietan ebatzi arte. Era berean, zintzotasun demokratiko apur bat badu, Labrazako kontzejuak eman dion agindua bete beharko luke, kontzejuak proiektu honi emandako ezezko biribila kontuan hartuta".

"EAJ-PSEren gobernua eta EH Bilduren udal gobernua dira kontzejuen erabakiak transnazional energetikoen planen pean jartzen dituztenak"

Aixeindar da Labrazako zentral eolikoaren enpresa sustatzailea: Eusko Jaurlaritzak %40ko partaidetza du bertan eta Iberdrolak beste %60a. Arabako Mendiak Askek nabarmendu du "gure erakundeak direla administrazio-batzarrek beren lurraldeen gainean dituzten eskubide guztiak urratzen dituztenak eta baita naturguneek dituzten ingurumen babesak ere urratzen dituztenak, Labrazako mendienak kasu".

Alderdi politikoak seinalatu ditu Arabako Mendiak Askek: "EAJ-PSEren gobernua eta EH Bilduren udal gobernua dira deriba autoritario horren erantzuleak, kontzejuen erabakiak transnazional energetikoen planen pean jartzen dituztenak, kasu honetan Iberdrolaren esku, herri ondasunen merkantilizazioa sustatuta eta bultzatuta".

Diskurtsoa eta praxia ez datozela bat salatu du Arabako Mendiak Askek: "Zentzugabekeria hau ez dator bat ahoz aho aldarrikatzen duten herritarren parte-hartzearekin. Haien ekintzak aldarrikatzen duten horren aurka doaz. Era berean, gogoratu behar da ez dagoela indarrean kokapen hori bermatzen duen Lurraldearen Arloko Planik (LAP), eta izapidetzen ari den LAPa zalantzan jarri duela gehiengo sozial zabal batek. (...) Horregatik salatzen ditugu gure oinarrizko eskubideen kaltetan hiru alderdi horiek enpresetako eliteekin duten adostasuna, lankidetza eta menpekotasuna".

"Labraza arriskuan dago, kontzeju guztiak daude arriskuan", ohartarazi dute eta dei egin diete herritarrei: "Salatu ditzagun jarrera horiek gure indar guztiekin. Erabakiak hartzerakoan daukagun eskubidearen aurkako jarduera horiek zapuztea lortu beharra daukagu. Ondorioz, lurraldearen defentsan lanean diharduten plataforma ezberdinek deituriko mobilizaziotan parte hartzeko eskaera egiten dugu, bereziki Arabako Errioxa Bizirik-ek proposatutakoetan".