London School of Hygiene & Tropical Medicine-k zuzendutako ikerketak Europako 854 hiri-eremutako datuak baliatu ditu 2015-2099 urteen arteko beroteen ondoriozko hildakoak kalkulatzeko. Halaber, azpimarratu dute hegoaldeak eta ekialdeak berotegi efektuaren ondorioak gogorrago jasango dituztela iparraldearekin alderatuz, baina hala ere, arintze- eta egokitze-neurri sendoak aplikatu ezean, Europako hiri gehienetan  heriotzak hazi egingo liratekeela.

Ikerketan etorkizunera begira hiru eszenario aurreikusten dira. Lehenengoa, Pariseko Akordioetan oinarritzen dena, aurreikuspenen artean hoberena da, bi graduko igoera ekarriko lukeena. Bigarren eszenarioa bi eta hiru gradu arteko igoeran kokatzen da, eta hirugarrena, hiru eta lau graduko igoerarekin, aurreikuspen txarrenean kokatzen da. Azken hori aurreikuspen txarrena izateaz gain, egungo egoerara gerturatzen den kasua da eta 2,3 miloi hildako gehiago sortuko lituzkeena.

Bestalde, egungo testuinguru geopolitikoa aztertuz gero, berotegi efektuari egokitzearen aldeko hotsak dira indartsuenak, klima aldaketa arintzearen aldekoen aurrean. Ikerketak premisa horri aurre egiten dio, haien aburuz "erregai fosilen erabilera murrizteko anbizio handiko politikekin jarraitzea funtsezkoa da", berdeguneen eta zuhaitzen landaketak graduen igoera lausotu besterik ez baitu egiten.