Nafarroako Suhiltzaileak Zarrakazteluko sutean lanean.

Espainiako Gobernuak gizarte babeseko plana onartu du, eta bertan hondamendi eremu izendatu ditu Nafarroako bi eremu: Muruzabal eta Zarrakaztelu. Biek suteak pairatu dituzte abuztuan, 500 hektareatik gora erre dira bien artean. Orain, neurria onartuta, kalteak zenbatu eta dagozkien departamentuen esku geratuko da kalte ordainak bideratzea, Fernando Grande Marlaska Espainiako Gobernuko Barne ministroak azaldu duenez.

Marlaskak iragarritako izendapenak helburu du Nafarroako eta Espainiako Gobernuen baliabideen arteko koordinazioa. Ministroak aurreratu du izendapenak ez dakarrela neurri ekonomiko zehatzik, baina azaldu du Babes Zibileko legeak arautzen duela laguntza, eta Ogasun Ministerioak eta Gizarte Segurantzak kalte ordainak ordaindu ahalko dituzte: laguntza zuzenak egon ahalko dira, hobari fiskalak, nekazaritza eta abeltzaintza ekoizpenerako dirulaguntzak eta beste.

Abuztu gogorra izan da Nafarroan. Hilabetearen hasieran piztu zen Muruzabalgo sutea, eta hasieratik bertatik alertaren bigarren mailan ezarri zuten eremua. Larritasun bera izan zuen Zarrakaztelukoak ere, hurrengo astean. Egoerari “muturrekoa” iritzi zion Nafarroako Gobernuak, eta suteak perimetratuta izanda ere, foru dekretua onartu eta nekazaritza lanak legez mugatu zituen.