Bi lurrikaren ondotik, Venezuelako egoera muturrekoa izatetik gertu dago.

Venezuelako bi lurrikarek eragindako hondamendia geroz eta latzagoa da. Hala ohartarazi dute nazioarteko erakundeek asteartean Genevan (Suitzan) egindako prentsaurrekoan. OME Osasunaren Mundu Erakundeak kezka azaleratu du herrialdeko osasun egoera dela eta: zauritu asko, eta elikagai eta baliabide eskasia daude. Bestetik, UNHCR Iheslarientzako NBEren Agentziak nabarmendu du milaka direla etxerik gabe geratu eta lekualdatu behar izan diren hiritarrak. Gaineratu du familiengandik bananduta dauden adin txikikoak daudela.

Azken datuen arabera, gutxienez 1.943 pertsona hil dira eta 10.571 zauritu daude Venezuelan ekainaren 24ko lurrikarengatik, eta NBEk jakinarazi du 50.000 desagertu inguru daudela. Herrialdean "tentsioa areagotzen" ari da OMEren eta UNHCRren arabera, batez ere La Guaira estatuan eta inguruko eremuetan, baliabide faltagatik. 

Naiz-ek jaso duenez, OMEk azaldu du osasun zerbitzuak "muturreko presiopean" daudela, zenbait kasutan instalazioen baliabideen gainetik ari dira jarduten. Lurrikarak gertatu eta hiru egunetara, ekainaren 27an, OMEk Caracas, La Guaira, Miranda eta Falcón hirietako 21 ospitaleren egoera aztertu zuen. Horietatik hiru muturreko egoeran daude, seik egiturazko arazoak dituzte edo partzialki funtzionatzen dute eta gainontzekoek galera garrantzitsuak dituzte. 

Ospitaleak gainezka egoteak bete-betean eragiten du zaurituen eta kaltetuen osasunean. Besteak beste, langileak muturreko presiopean dabiltza lanean eta ebakuntzak egiteko itxaron-zerrenda luzea da. "Gabezia nagusietako bat zerbitzu-forentseen eta gorputegien kolapsoa da, baita eskasia ere biktimak erregistratzeko eta desagertutako pertsonak aurkitzeko sistematan", esan du Christian Lindmeier OMEko ordezkariak. 

Izurriteen arriskua

Une honetan Venezuela izurriteak garatzeko eszenatokia da. OMEk azaldu duenez, osasun zerbitzuen galerek, uraren eskasiak eta hiritarren lekualdetzeek eragin ditzakete, adibidez, elgorria edo difteria gaixotasunak. Era berean, uretik eta bektoreetatik kutsatzen diren gaixotasunen izurriteak ere sor daitezke, hala nola sukar horia, dengea eta malaria.

Etxerik gabe eta kalean

Genevan emandako prentsaurrekoan Iheslarientzako NBEren Agentziak azpimarratu du suntsitutako eremuen egoera "azkar batean okertu" dela, eta "behar-humanitarioen eta babes-beharren gorakada izugarria" dela. Gutxienez 16.000 pertsona daude kaltetuta, eta horietako asko etxerik gabe geratu dira. 

UNHCRk adierazi du, La Guairako egoera aztertu ondoren, aztertutako pertsonen erdia bizilagunen edo familien etxeetan dagoela, eta beste %39 kalean eta espazio publikoan, eliza, eskola edo behin-behineko instalazioetan. Azken horiek, erakundearen hitzetan, ez dituzte betetzen "gutxieneko babes, pribatutasun edo higiene baldintzak". 

Asko dira, gainera, gurasorik gabe dauden haurrak. Inkestatuen %17k jakinarazi du antzeman duela laguntzarik gabe edo familiatik bananduta dauden adin txikikorik. UNHCRk kanpaina bat abiatu du haurrak identifikatzeko eta familiak bilatzeko, haurtzaroa babestu eta familien banaketa ekiditeko.