Gasteizen du bulegoa Bionekazaritza elkarteak, eta hirian antolatzen dituzte bilera, tailer eta bestelako ekimen gehienak urtean zehar. "Hala ere, beti esaten dugu elkartea nekazari eta abeltzain ekologikoen taldea izanik, deszentralizatzeko beharra dugula, gure ekimenak lurraldeko beste txoko batzuetara ere eramanda", azaldu du. Bide horretan, agroekologiaren inguruko lana eta ideiak zabaltzeko eta ekoizle, herritar nahiz bestelako kolektiboen inguruko sarea indartzeko asmoz antolatu dute Iraila Agroekologikoa. Ondoko ekimenak izanen dira hurrengo egunetan:

- Irailak 17, Kuartangon: Ibilbide botanikoa eta botika kutxa osatzea, Pachamama Amalurraren eskutik, 18:00etan.

- Irailak 21, Gasteizko egoitzan: Hitzaldia. MST: 40 urte mundu berri baten alde borrokan izenburupean, Brasilen izan diren Askapenako brigadisten eskutik, 18:00etan.

- Irailak 22, Gasteizko Liburutopian: Onintza Enbeitaren Bizitza baten txatalak liburuaren aurkezpena, 18:00etan.

- Irailak 23: Nekazaritza Ekologikoaren Europako Eguna dela eta, bazkideen artean otar zozketa.

- Irailak 29, Gasteizko Bioalain: Emakumeen zikloen eta osasun hormonalaren inguruko saio teoriko-praktikoa, Garbiñe Larrearen eskutik, 17:30ean.

Azoka, egun handia

Irailaren 26an izango da aurtengo Bionekaraba merkatua, beti bezala Gasteizko Foru Plazan, eta azoka egunean bertan ere hainbat hitzaldi eta ekimen antolatu dituzte: batetik, Haziak liburuaren aurkezpena eginen dute Marc Badal eta Kelo Arribasek; bestetik, Galiziako eta Valentziako landa eremuko kuir jaialdietako kideak izanen dira hitzaldia ematen; eta Karmine jatetxeak sukalde erakustaldia eginen du plazan bertan. "30 postu inguru izanen dira aurtengo merkatuan, gehienak Arabako ekoizleak, baina inguruko lurraldeetako zenbait ere bai, guztiak ekologikoak eta salmenta zuzena egiten dutenak", adierazi du Zarauzek.