Atzean Sarbil, proiektu fotovoltaikoa jaso behar zuen mendia.

Irailaren 15ean emandako ebazpenean, Nafarroako Gobernuko Ingurumen Sailak dio proiektuaren ezaugarriak ez datozela bat Sarbileko mendiak pasaiaren, ekologiaren eta ingurumenaren alorrean dituen baloreekin. Sarbil mendia Etxauriko (Nafarroa) mendilerroan dago eta Cabezón de Etxauriere moduan ere ezagutzen da. Sarbil Eguzki SL enpresak bideratu du proiektua eta Etxauriko Udalak hitzarmena sinatu zuen harekin, "proiektua bailararen onurarako” erabil zedin.

Sarbil mendiaren magalean, 800 bat metroko altueran finkatu behar ziren 80.000 bat eguzki plaka, ehun bat futbol zelairen tamainako eremu batean. Etxauriko Udalaren arabera –alkatetza EH Bildurena da–, 20.000 bat etxerentzako adinako energia sortuko zen proiektu honekin, espekulazioaren aurkako neurriekin, herritarren parte-hartzearekin eta bailara osoaren onurarako. Berez, Etxauri, Orkoien eta Oltza Zendea udalerriei eragiten zien, baina batez ere Etxauriri. Azken urtean bereziki proiektuak herritarren arteko zatiketa handia ekarri du Etxaurin eta inguruetan.

Cabezon de Etxauri Bizirik herri mugimendua izan da proiektuaren aurka aritu den taldeetakoa eta apirilean 260 orrialdeko txostena aurkeztu zuen haren kontra Nafarroako Gobernuko Ingurumen Sailean. Beste 2.500 sinadura ere jaso izan dira proiektuaren aurka, eta jarrera bera erakutsi dute Oltza Zendea, Jaitz, Goñi Bailara, Bidaurreta, Belaskoain, Larraia, Izurzu, Lezaun, Otxobi eta Sarasateko udalek. Ezezkoa eman diotenen artean izan dira, halaber, Nafarroako Mendi eta Eskalada Federazioa, Sustrai Erakuntza, Ekologistak Martxan, SEO/BirdLife edota Satorrak taldea.