Landareak biltzen eta mazerazioak egiten hasi zen Uriel, eta ukenduak, xaboiak eta bestelako produktuak egiten zituen berarentzat. Gerora, ordea, kosmetika solidoan eta gorputzeko garbitasunerako produktuetan zentratu zen: “Tailerrak eta hainbat formazio saio egin ditut kosmetika solidoaren inguruan, eta orain bereziki horretan ari naiz”. Xanpu solidoak, gorputzerako xaboiak, aurpegirako krema solidoak, hortzetako pasta eta antzerakoak egiten ditu Lekarozko tailerrean.

“Hasieran neronek biltzen nituen landareak, baina ekoizpena zertxobait handitu den honetan, inguruko belar-dendetan eta kosmetika solidoarekin lotutako webgune espezializatuetan erosten ditut”, gaineratu du. Tailerrean darabiltzan osagaiak produktu naturalak izatea bilatzen du, gehigarririk gabeak. “Osagai naturalak dira erabiltzen ditudan guztiak, ez dut perfumerik ezta koloratzailerik erabiltzen, eta xaboien kasuan sosarik ere ez”, gehitu du. Olio esentzialekin egiten du lan batik bat, eta produktuei kolorea emateko landareen pigmentuak erabiltzen ditu, kolore horixka emateko kurkuma, esaterako. “Horrez gain, saiatzen naiz produktuak ahalik eta sinpleen aurkezten, bilgarri gehiegirik gabe eta ontziratu gabe”.

Azokak, salmentarako bide nagusi

Zugarramurdin sortu zen Nük Natura proiektua eta gaur egun Lekarozen du tailerra Urielek, baina denda fisikorik ez du. “Inguruko azoketan ibiltzen naiz, eta horien berri ematen dut sare sozialetan”, dio. Eskaerak ere bertatik jasotzen ditu, eta noizean behin egiten dituen tailer edo ikastaroen berri ere ematen du. “Bailaran ekintza desberdinak eskaintzeagatik, egin izan dugu formazio saioren bat Saran eta Elizondon, baina oso noizean behin”, adierazi du.

Gurasotasuna medio, geldialditxoa egin du tarte batez ekoizleak, baina pixkanaka berriz ere martxan dela eta aurrera begira ekoizpena gehixeago handitu eta profesionalizatzeko ideia duela adierazi du: “Hasi nintzenean jende askok ez zuen kosmetika solidoa ezagutu ere egiten, arraroa zen, baina sumatzen da geroz eta interes handiagoa dagoela eta produktuok nondik datozen eta nola eginak dauden gehiago begiratzen dela”, amaitu du.