Mikel Jauregi sailburuaren esanetan Eusko Jaurlaritzak ez du "inolako arau hausterik atzeman" Ekondakinek Zubietako erraustegitik Artaxoako zabortegira bidalitako lixibiatuetan. Hala, ez du sozietate publikoa zigortuko, Nafarroako Gobernuak eskatu bezala.
Mikel Jauregi Industria sailburua Eusko Legebiltzarrean azalpenak ematen asteazkenean. Argazkia: Irekia
Imanol Pradales EAEko lehendakariak duela gutxi adierazi arren Eusko Jaurlaritza prest zegoela Artaxoara bidalitako milaka tona lixibiatuen inguruan Nafarroako Gobernuko ordezkariekin "hitz egiteko", Mikel Jauregi Industria, Trantsizio Energetiko eta Jasangarritasun sailburuak argitu du ez dutela Zubietako erraustegia kudeatzen duen Ekondakin zigortuko.
Alderdi Popularreko parlamentari Alvaro Gotxik egindako galdera bati idatziz erantzun dio sailburuak, asteleheneko data daraman dokumentu batean: "Erakunde honek, bidalitako informazioa aztertu ondoren, uste du ez dagoela inolako arau-hausterik hondakinak sortzeari dagokionez", dio. Nolanahi ere, erantzun berean dio prest jarraitzen dutela Nafarroako Gobernuarekin hitz egiteko "edozein galdera argitzeko edo informazio gehiago emateko".
2022. eta 2023. urteen artean, Zubietatik Artaxoara milaka tona lixibiatu eraman zituzten, baina beste LER kode bat jarrita, lohiak balira bezala, horretarako baimenik ez zuten arren. Donostiako epaitegi batek auzibide penala ireki zuen ilegaltasunik izan den ikusteko, eta besteak beste, GuraSOS elkartearen esanetan, Gipuzkoako Hondakinen Kontsortzioko presidente eta Gipuzkoako Ingurumen diputatu José Igancio Asensio jarri zuen ikerketapean.
Nafarroako Gobernuak Artaxoako zabortegia itxi eta hura kudeatzen duen Ecofert enpresa zigortu du, eta Ekondakinekin gauza bera egiteko eskatu zion ekainean Eusko Jaurlaritzari.
Pradalesen duela gutxiko hitzek halako zerbait egiteko prest zeudela adierazten zuten arren –auzia "teknikoki labainkorra" eta "konplexua" zela esan zuen–, Jauregik bere idatzian garbi utzi du aurreko gobernuko arduradunen iritzi bera duela exekutibo berriak.
Arantxa Tapia aurreko Ingurumen sailburuak eta Iñigo Urkullu lehendakari ohiak ez dute inoiz onartu irregulartasunik izan denik hondakin horien kudeaketan. Hortaz, Jaurlaritzak ez dio Ekondakini zigor espedienterik irekiko.
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545
Bidelagun
cc by-sa
Sareko kide
Ekoedizioaren Institutuko bazkide
