Basaurin eraiki nahi dituzten sukalde elektriko bertikalak aurkezteko, Bilboko ikastetxe batekoa bisitatu dute.

Basauriko zazpi ikastetxe publikotik hiruk sukalde elektriko bertikal propioa izango dute eta beste lauri zerbitzua emateko zonaldeko sukalde bat eraikiko dute. EAEko “lehen udal eredu mistoa” iragarri dute Begoña Pedrosa Hezkuntza sailburuak eta herriko alkate Asier Iragorrik.

Sistema berriaren helburua da eskola-menuen eguneroko eta hurbileko elaborazioa lehenestea, “hurbiltasuneko eskola-elikaduraren eredu osasungarri eta jasangarri baterantz”. Pedrosaren hitzetan, “kontua ez da soilik sukalde berriak sartzea, baizik eta Euskadiko eskola-elikaduraren sistema progresiboki eraldatzea”.

Gurasoek protesta deitu dute

Ikastetxeotako guraso elkarteak, ordea, kritiko agertu dira Hezkuntza Sailaren iragarpenarekin eta lapiko-jotzea deitu dute ostegun honetarako, herriko udaletxe atarian. Eskola horietako batean (Arizko ikastola publikoan) ama den Olatz Ayo-rekin hitz egin du ARGIAk. Eredu aitzindari izate horri ez dio zentzu handirik ikusten, azken finean eskolan edo zonaldean sukaldea ezartzeaz ari baikara, “eta beste ikastetxe batzuetan dagoeneko jarri dituzte sukalde propioak, gurean baino lehenago”.

Kontuak kontu, eta sukalde propioa aurrerapausoa dela iritzita ere, garbi utzi nahi izan du: “Guretzat garrantzitsuena elikagaien kalitatea da. Sukalde berrietan zein izango da  hornitzailea? Zein kalitate bermatuko da? Horretaz guztiaz ez dugu hitz egin. Datozen lizitaziorako pleguak orain atera dituzte, lizitaziorako irizpideetan zerbait aldatu al da? Gurean Eurest catering enpresak ematen du zerbitzua eta ez gaude batere gustura”.

Epeetan ere zehaztasun falta salatu du Ayok. Sistemaren aurkezpen egunean, Begoña Pedrosak adierazi zuen “zaila” dela “data batzuk ematea”, baina aurreikusi dutela ikastetxeetako batean obrak aurten hastea eta progresiboki garatuko direla hurrengo sukaldeak. “Progresiboki zein erritmotan? Hiru ikasturte pasata hasiko dira zonaldeko sukaldearekin? Ez dugu ezer konkreturik jaso. Hedabide guztietan atera da albistea, baina atzo bezala gaur eta bihar, berdin-berdin da kalitate txarrekoa da gure umeek jaten dutena”.

Eskola-jantokian ratioak jaisteaz eta proiektu pedagogiko bat garatzeaz ere hitz egin dela, baina ez dagoela zehaztasunik gaineratu du.

Hori bai, sukalde elektriko bertikala bertatik bertara ezagutu zuen, aurkezpen egunean, ama honek: “Oso ondo daude, garbiak dira, ergonomikoak, efizienteagoak… eta prestatu zituzten jakiak ere kalitate onekoak ziren; ea hori gurean ere bermatzen den”.

Hernaniko ereduan, kudeatzaile nutrizionala

Hain justu, joan den astean eman genuen Hernaniko hezkuntza komunitatearen eskaeraren eta lanketaren berri. Haiek ere, ikastetxeetan bertan sukaldea eraikitzea eskatu dute, baina baita figura inportante bat ere: entitate publiko bat sortu nahi dute herrian, alde logistiko eta nutrizionala kudeatzeko eta bermatzeko. Eusko Legebiltzarrean egin zuten aurkezpenean eta jaso zuten erantzunean sakontzeko, lotura honetan aurki dezakezu albistea.

Sukaldeak ikastetxeetan, hazten ari den eskaera

Eskola-jantokien eskariak nabarmen egin du gora EAEn, eta azken bost urteetan 120 ikastetxetik 158ra igaro da sukaldea bertan duten eskolen kopurua, eta beste 50 (in situ eta zonaldekoak) aurreikusiak ditu Eusko Jaurlaritzak, Hezkuntza Eraiki 2030 planaren baitan.

Jaurlaritzak berak emandako datuen arabera, in situ sei sukalde bertikal instalatu ditu Lardizabal Herri Eskolan (Aia), Zurbaran HLHIn (Bilbo), Txurdinaga HLHIn (Bilbo), Alonsotegi HLHIn (Alonsotegi), Talaia Eskolan (Hondarribia) eta Lantziego Ikastola HLHIn (Lantziego). Aurreikusitako plangintzan, Leioak, Urduñak, Bilbok, Arrigorriagak, Ermuak, Abadiñok, Iurretak, Plentziak, Santurtzik, Amurriok, Arratzua-Ubarrundiak, Hernanik edo Irunek aurrera egingo dute nagusiki in situ sukaldeak ezartzeko, eta Zamudiok eta Villabonak zonako sukaldeei lotutako ereduak garatuko dituzte.

Basaurin bezala, Gasteizen ere eredu mistoak garatzea aurreikusten dute Lakuatik, alegia in situ eta zonako sukaldeak uztartuta.