ARGIAk 2018an jaso zuen Rikardo Arregi saria, Zeruko Argiatik ARGIAra egindako ibilbideagatik.

Zortzi finalistaren artetik bi Rikardo Arregi sari banatuko dira, kazetaritzarena eta komunikazioarena, eta irabazle bakoitzari bederatzi mila euro banatuko dizkiete. Sari-banaketaren ekitaldia gaur izango da, azaroaren 26an, Andoaingo Bastero Kulturgunean, 19:00etan. Gainerako finalistekin batera, Jakoba Errekondo izango da oholtza gainean, Rikardo Arregi sarien ohorezko mugarria emango baitiote. “Baratzea ezarri du denen bizitzen erdigunean, izan hirian, izan baserri guneetan”. Horrela goraipatu dute epaimahaikideek agronomo eta paisajistak hamarkadetan egindako lana. Baratzearen inguruko jakintza Euskal Herriko hamaika txokotara zabaltzen egindako ibilbide luzeagatik jasoko du saria usurbildarrak.

ARGIAko eta Bizi Baratzeko irakurleek jakingo dutenez, Jakoba Errekondok 30 urte daramatza astero-astero lurrari lotutako gaiak lantzen astekariko Bizi Baratzea atalean. Hain zuzen, 2025a urteurrenez beteta izan du Errekondok: ARGIArekin argitaratutako Bizi Baratzea liburuak ere 10 urte bete ditu, eta ospakizun artean kaleratu dugu Bizi Baratzea Orria ere, urtaro bakoitzean lurrari begiratzen dion aldizkari berezia, Errekondoren artikuluak ere barne hartzen dituena. Gainera, Rikardo Arregiko ohorezko sarituak 40 urte egin ditu larunbat goizetan Euskadi Irratiko Landaberri saioan baratzeko aholkuak emanez, eta Elhuyarren ere kolaboratu izan du. Lurrari, ilargiari eta baratzeari buruzko jakintza bildu eta herrira zabaltzeko lan horregatik guztiagatik saritu dute Jakoba Errekondo.

Jenofa Berhokoirigoin finalista

Mendez mende dabilen lanbidea, garai berrietara egokitu nahian erreportajeagatik izendatu dute kazetaritza sariaren finalista Jenofa Berhokoirigoin ARGIAko kazetaria. Baxenabarre eta Zuberoan uda mendi etxoletan pasatzen duten hainbat artzainen egunerokoa biltzen du artikuluak, eta beraien lanbideaz eta mendiko biziaz dituzten gogoetak, kezkak eta ametsak jaso ditu bertan Gamarteko (Nafarroa Beherea) kazetariak.

Hauek dira epaimahaiak emandako argudioak, finalista gisa hautatzeko: "Etengabe aldatzen doan mundu baten inguruko erreportaje multi-ahostuna eskaintzen digu Argiako orrialdeetan. Aldatzen ari da eta gainera feminizatzen. Beti geldoa eta ohiturazkoa irudikatzen dugun artzaintza du aztergai, molde bizi eta zinez interesgarri batean. Elkarrizketa ezberdinen bidez, lurrik gabeko artzainen mendiko bizipenak, kezkak, plazerak agertzen dizkigu, ustez ezagutzen dugun -gehienbat idealizatzen duguna- baina funtsean arras ezezagun zaigun artzainen egunerokotasuna partekatzeko. Hizkuntza sotil eta gozo batean dago idatzita artikulua, ez gara galtzen, alderantziz. Bortuetako ofizio batekiko begirada ezberdina bideratzeko baliosa den artikulua".

Kazetaritza sariaren gainontzeko finalistak hauek dira: Goiena, Datuetatik tiraka saioagatik; Baleuko ekoiztetxea, Ur handitan. Palestina, gatazka amaigabea saioagatik; eta Nagore Arin, Berrian eginiko Boiseko Jaialdiari buruzko dokumental eta kronikagatik. Komunikazio sarietako finalistak, aldiz, beste lau hauek dira: Elhuyar, Zurrunbiloa proiektuagatik; Ulu Media, ULUA hedabide digitalagatik; GUKA, Erdalduntze makina kanpainagatik; eta on.eus ataria.

Saridunak hautatuko dituzten epaimahai kideak hauexek dira: Miren Berasategi Zeberio (Deustuko Unibertsitateko irakasle eta ikerlaria), Eneko Bidegain Aire (idazlea eta Mondragon Unibertsitateko HUHEZI fakultateko irakaslea), Itxaro Borda (idazlea eta prentsa kolaboratzailea), Angel Erro Jimenez (idazlea, itzultzailea eta prentsa kolaboratzailea), Pantxika Maitia (kazetaria), Libe Mimenza Castillo (UPV/EHUko irakaslea eta ikerlaria), Marta Lasa Goñi (mahaiburua eta Andoaingo Udaleko Euskarako zinegotzi arduraduna), eta Arantza Aguado Perugorria (idazkaria eta Andoaingo Udaleko Euskara teknikaria).