Dorre elektrikoak sai zuriaren habitik 150 metrora baino ez dituzte eraiki, salatu dutenez. Irudiak: Makatzak eta Begitu

Sai zuriak habia egiten duen Aramotz mendizerrako eremuetan dorre elektrikoak altxatzen hasi da Red Eléctrica Española enpresa, Gueñes eta Itsaso artean eraikitzen ari den autopista elektrikoaren lanen barruan. Makatzak talde ekologistak salatu du lanek mehatxuan jarri dutela hegazti horren populazioa.

Europa osoan babesturik dago hegazti nekrofago hori. Gainera, babes horri gehitu behar zaio dorreak egiten ari diren tokia "Urkiola Natur Parkeko banda periferikoan" dagoela, talde ekologistaren esanetan.

Dorreak sai zuri bikotea joan ostean hasi dira eraikitzen, ARGIAri nabarmendu diotenez "presaka eraiki ere", honek irailean Afrikako kontinenteko Sahelerantz migratu baitzuen, eta udaberrira arte ez da itzuliko. "Gure biktimaren 'ehiza' erraztuko duten Red Electrica Españolaren dorreak mehatxagarri ikusten dira. Sai zuria ehizatzeko 400 kW-eko kableak jartzea baino ez da falta", diote.

Begitu Arratiako tokiko aldizkariak iruditan jaso du salatutakoa:

Makatzakek Facebook kontuan azpimarratu duenez, proiektuaren Ingurumen Inpaktu Adierazpenean ez da ageri sai zuriaren habiarik, baina Estatuko Aldizkari Orokorrean, aldiz, sai "arrea" dagoela esaten da. Beren ustez "transkripzio akats horren ondorioz" proiektuak aldeko adierazpena jaso du, jarritako helegiteak atzera bota ostean. Gainera, gaur egun gutxienez miru zuriaren lau habia ere badaude, ekologistek egiaztatu ahal izan dutenez.

Gueñes eta Itsaso arteko goi tentsioko bi hariko linea duen azpiegitura eraikitzeko, 70 metroko garaiera duten 132 dorre altxa dira 24 udalerritan.

Hori guztia salatzeko, larunbat honetan Aramotzera irteera egingo dute, Igorreko udaletxe paretik abiatuta goizeko 10:00etan.