"Tauste (Aragoi) eta Jundiz (Araba) arteko elektrizitatea garraitzeko linea ez da errealitate bihurtuko", adierazi du asteazkenean Errioxatik PSOEko diputatu den Jesús María Garcíak. Diputatuak hainbat arrazoi azaldu ditu. Batetik, martxoaren 19an amaitu zela proiektua aurkezteko epea, eta Forestalia enpresa-taldeak ordurako ez zuenez proposamenik eginda, kasua "egun gutxi barru" artxibatzeko erabakia hartu duela Espainiako Gobernuak.

Bestetik, linea horretan garraiatu behar zen elektrizitatea sortzeko bi parke eoliko eraiki nahi zituen Forestaliak Aragoiko Tauste eskualdean. Bi proiektu horiek gauzatzeko baimenak, ordea, ez ditu lortu oraindik. Gainera, goi tentsioko linea horren balioa 50 milioi eurotan hazten zuen arazo batekin topatu zen enpresa duela gutxi: 25 kilometroko kableak lurperatzea. Proiektu hau baztertuta ere, beste hainbat dituzte esku artean Forestaliak eta Espainiako Sare Elektrikoak: horietako batek, adibidez, 270 kilometro izango lituzke, eta Zaragoza lurraldeko Cinco Villas herrian hasiko litzateke eta Gatikan amaitu.

Instituzioen kritikak

Berez, 200 kilometrotik gorako linea Zaragozako Tauste eskualdean hasi behar zen eta Nafarroako Erribera, Errioxa, Araba eta Burgos zeharkatuta. Instituzio ugariren gaitzespena jaso du proiektuak azken urteetan –Aragoiko Gobernua salbu, lineak zeharkatu behar zituen lurretako erakundeak proiektuaren aurka agertu ziren–. Esaterako, 2023ko urrian Nafarroako Landa Garapen eta Ingurumen kontseilari Joxe Mari Aierdik esan zuen linea "eginezina" zela. Asteazkeneko Arabako Batzar Nagusietan EH Bilduk duen bozeramaileak, Eva López de Arroyabek, begi onez hartu zuen Forestaliaren erabakia, proiektuak "ez zuelako zentzurik": "Ebakuazio lineak erabiltzeak eragiten du azpiestazioek arazoak izatea gertuagoko estazioetatik energia hartzeko".  

Energia berriztagarria sortzeko proiektuek aurrera egin ahala, horien elektrizitatea garraiatzeko linea proiektuak ere azaleratzen ari dira. Aragoiko Forestalia enpresa eta Red Electrica Española (REE) dira linea horiek eraiki nahi dituzten enpresak, lehena pribatua da eta erdi-publikoa. Berez, elektrizitatea distantzia handietara garraiatzeko lineak dira horiek, autobide elektriko moduan ezagutzen direnak; baina Sustrai Erakuntza ingumen fundazioak salatu duenez, berriztagarrien proiektuak ebakuatzeko linea hutsak balira bezala tramitatzen ari dira. Energia berriztagarria Aragoitik Gatikaraino eramateko linea elektrikoen zama erreportajea publikatu zuen ARGIAk iazko martxoan, auzi horren nondik norakoak azaltzeko. Oraindik dorreen eraikuntzarako baimenik eduki gabe, Forestalia linea horiek eraikitzeko presioa egiten ari zela kexatu zen Sustrai Erakuntza iazko martxoan. Ingurumen fundazioaren ustez, makroproiektu horiek "kaltegarriak" dira ingurumenerako: "Proiektu horiek gauzatuz gero, energiaren kudeaketarako funtsezkoa den jarduera bat, elektrizitatearen garraioa, esku pribatuen esku utziko litzateke".