AHTren obrak Atxondon, Arrazola inguruan, asteartean laneko heriotza gertatu zen zatian.

Pasa den asteartean Atxondoko AHTren trenbide zatiko obretan langile bat hil zen pieza bat gainera erorita. Osalanen arabera 49 urteko A.H.G kofratzaileak odol-isuria izan zuen eta odolustuta hil zen obretan bertan.

AHT Gelditu! elkarteak salatu du, "irakurketa hotz" horretatik harago, AHTko obretan bestelako errealitate bat dagoela, "enpresa handien diru-goseak" eta azpikontrata-kateek baldintzatua, langilek "prekarietate, segurtasun gabezia, gehiegizko lanaldiak eta etengabeko estresa" jasaten dituelako.

Atxondoko zatia Dragados eta Tecsa enpresek osaturiko aldi baterako enpresa-elkarteak dauka esleituta, ACS multinazionalaren filialak biak ere, hain justu AHTren obretako esleipen milioidunak jaso dituena. AHT Geldituk esan duenez, Dragados "AHTren G7" deituriko taldekoa da, hau da, "obren kontratu publikoak euren artean modu iruzurtian banatzeagatik" auzipetuta dauden edo isuna jaso duten eraikuntzako zazpi enpresen artean kokatu du.

Hildako langileak Conprovial (Constructora Proyectos Viales de Colombia Conprovial) azpikontratarentzat egiten zuen lan, LAB sindikatuak jakitera eman duenez. Hau da, multinazional baten esku dagoen lan-elkarte bateko enpresa batek azpikontraturiko enpresa bateko langilea zen.

AHT Gelditu!-k halako obretan dauden tratu "arrazista, umiliagarri eta iraingarriak" nabarmendu ditu, eta ziurtatu du gehienetan egoera zaurgarrian dauden migratzaileak direla lan horiek egiten dituztenak. "Lan esplotazio” horren aurrean, erkidegoetako administrazioek arduragabekeriaz jokatzen dutela salatu du, era berean.

Duela hilabete batzuk elkarteak Nafarroako AHTren obretan langileek bizi dituzten “esklabotza-baldintzen” inguruko testigantza zabaldu zuen. Araba, Bizkia eta Gipuzkoan egiten ari diren Euskal Y deiturikoaren kasuan, berriz, ARGIAk eta ELA sindikatuak elkarlanean egindako ikerlanari esker –Zuloan kronika-liburuan argitaratua– testigantza eta kasu gehiago azaleratu genituen.

Honakoarekin, AHT eraikitzen 13 langile hil dira jadanik. Horregatik guztiagatik obrak “berehala gelditzea” eskatu du AHT Gelditu!-k.

Atxondoko Udala: “Gertatutakoa ikertu eta argitzeko eskatzen dugu”

Atxondoko Udalak adierazpen instituzionala kaleratu du AHTko obretan hildako langilearen senideei “doluminak eta elkartasuna” adierazteko.

Udalak adierazi du laneko segurtasunak “lehentasunezko tokia” izan behar duela edozein jardueratan eta horretarako ezinbesteko jo du prebentziorako araudiak “zorrotz betearaztea”.

Ildo berean, asteartean gertaturikoa ikertzeko eta argitzeko eskatu die arduradun publikoei, “halako ezbeharrak berriro gerta ez daitezen”, eta bat egin du heriotza salatzeko antolatu diren deialdiekin.

Elkarretaratzea Bilbon

LAB, Esk, EHNE-Etxalde, Steilas eta Hiru sindikatuek deituta, ostiral honetan elkarretaratzea egingo dute Bilbon, AHTko obretako orain arteko 13 heriotzak salatzeko.

Patronalak eta instituzioek gaixotu eta hiltzen gaituzte lelopean, goizeko 11:00etan elkarretaratuko dira Gran Via kalean, Eusko Jaurlaritzaren egoitzaren aurrean.