Arantzazuko Artzain Eskolan egin zuen urtebete Idiakezek, eta han zen bitartean jarri zituen ardiak, gazta egiten hasteko asmoz. "Industrian ari nintzen lanean aurretik, baina sentitzen nuen ez zela egon nahi nuen tokia, eta baserrira bizitzera etorri ginenean toki honek ematen zituen aukerak aprobetxatzea erabaki nuen", dio. Urtebete pasatxoko ibilbidea du artzaintza proiektuak, hasi berria da eta oraindik martxa hartzen ari da.

Momentuz, tailerreko lana erdira murriztuta dauka, eta baserritar mixto profesionala da, Gipuzkoako Foru Aldundiko laguntzaren bidez: "Laguntza horrek aukera eman dit baserriaren aldeko apustua egiteko, baina bestea guztiz utzi gabe, aldaketa pixkanaka eginez eta segurtasun gehiagorekin".

Ardi esnea, gazta eta arkumeak ekoizten hasi da artzaina, baina ukuilua eta gaztandegia muntatzeko lanean ari da, eta burokrazia kontuak direla eta produktuak saltzen datorren urtean hasiko dela aurreikusten du. "Etorkizunean gazta desberdinak egitea gustatuko litzaiguke, gazta freskoarekin hasteko gogoz gaude, eta baita gatzurarekin probak eta ikerketak egiteko ere", gehitu du. Hasieratik argi izan du eredu ekologikoan ariko zela, ingurumenaren zaintza ere badelako proiektuaren helburuetako bat. "Hiru ume ditugu, eta etorkizunean, ondorengoei utziko diegunean pentsatzean, ezinbestekoa iruditzen zait elikadura duina eta osasungarria ziurtatzea, baina baita ingurumenarekiko errespetuzkoa ere", dio.

Osasunerako produktuak sortzetik, kontsultara salto

Agirresaroberen kasuan, naturopatia eta sendabelarren inguruko ikasketez gain, iridiologia, reflexologia eta beste hainbat formazio jaso ditu azken urteotan, eta osasunari lotutako dibulgazio lanean ari da orain. "Mimogoxo markarekin azoketan nenbilen, baina ohartu nintzen produktuak saltzea baino nahiago nuela pertsonei erantzun pertsonalizatuagoa ematea, eta ekoiztetik kontsultarako saltoa ematea erabaki nuen", azaldu du. Osasuna zaintzeari begirako hitzaldiak, olio esentzialen, alanbikearen edo xaboien inguruko ikastaroak eta antzekoak eskaintzen ditu gaur egun. "Tailer desberdinak eskaintzea da nire asmoa, eta horietako asko baserrian bertan edo hemen inguruan egitea".