Lizarrako Udaleko osoko bilkura bat.

Gai ordenako puntuak amaituta zituzten Ceutako bilkuraren ordurako, baina oraindik galdera eta erreguen atala abiatu gabe zegoen. Une horretan, UPNko taldeak osoko bilkura etetea eskatu zuen, atseden beharra argudiatuta. Marta Ruiz de Alda UPNko alkateak baiezkoa eman zion eskaerari, 30 minutuko etena agindu zuen eta talde osoa Ceutarekiko FEMPen elkartasun deialdira joan zen.

Diario de Noticias-en irakurri daitekeenez,ez da auziari lotutako UPNren gezur bakarra izan, egun batzuk lehenago Ana Duarte taldeko udal eledunak adierazi zuen Lizarrako Udalak bat egin zuela FEMPek egindako deialdiarekin. Osoko bilkuran, alkateak ezeztatu behar izan zuen hori, eta UPNren akatsa izan zela onartu zuen.

EH Bilduko Mikel Kolomo ordezkariaren esanetan, bilkurara joan ahal izateko alkatearen trikimailuak “herritar guztiekiko zein udalbatzarekiko begirune eza adierazten du”. EH Bilduk salatu duenez, alkateak eta udal sailetan lehendakaritzak dituztenek beren betebeharrak bertan behera utzi zituzten, galdera erreguei eta gainerakoen fiskalizazioari itxaron gabe: “Alkateak eta UPNko talde osoak, beraz, etena atsedenerako zela adierazita, herritarrei zor zaien egiari muzin egin diote”.

Lizarrako EH Bilduk salatu du, halaber, UPN eta alkatea beren alderdi ikuspegiari men eginda ari direla gobernatzen, eta ez Lizarrako herritar guztiei begira. Horren adibidetzat aipatu zituen, udalbatzak hainbatetan hartutako erabakiak ez betetzea: esate batera, uda honetan udalak txosnak jartzea erabaki zuen, baina alkateak ez zuen agindua bete; eta berdin gertatu da oposizioak adostu duen Santa Clara komentuaren erosketarekin edo Lizarrako frontoiaren konponketarekin. UPNk zazpi zinegotzi ditu udalean, EH Bilduk bost, PSNk bi, eta Geroa Baik, Contigo-Zurekinek eta PPk bana.